​រុស្ស៊ី​ ស្តីបន្ទោស​វេទិកាសេដ្ឋកិច្ច នៅទី​ក្រុង​ Davos (មានវីដេអូ)

កិច្ចពិភាក្សាអំពីការផ្គត់ផ្គង់រថក្រោះដល់អ៊ុយក្រែននៅឯវេទិកាសេដ្ឋកិច្ចពិភពលោកប្រចាំឆ្នាំ (WEF) ក្នុងទីក្រុង Davos នៃប្រទេសស្វីស គឺជា “រឿងអាម៉ាស់”។ នេះបើតាមការលើកឡើងរបស់អតីតប្រធានាធិបតីរុស្ស៊ីលោក Dmitry Medvedev។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅថ្ងៃពុធទី១៨ខែមករានេះ ប្រធានាធិបតីប៉ូឡូញ លោក Andrzej Duda បានប្រើវេទិកា WEF ដើម្បីអំពាវនាវឲ្យប្រទេសលោកខាងលិច បន្ថែមការគាំទ្រកាន់តែធំដល់ទីក្រុងកៀវ ចំពេលមានជម្លោះជាមួយរុស្ស៊ី។ លោកនិយាយថា “យើងសង្ឃឹមថា ដៃគូមួយចំនួនដែលជាសម្ព័ន្ធមិត្ត នឹងផ្តល់រថក្រោះដល់អ៊ុយក្រែន”។

ការលើកឡើងរបស់លោក Duda ត្រូវបានគាំទ្រដោយសមភាគីលីទុយអានីលោក Gitanas Nauseda ដែលនិយាយថា លោកជឿជាក់យ៉ាងមុតមាំថា អាល្លឺម៉ង់នឹងផ្តល់ឲ្យអ៊ុយក្រែននូវរថក្រោះ Leopard ថ្វីបើទីក្រុងបែរឡាំង មិនទាន់បានធ្វើការសម្រេចចិត្តលើបញ្ហានេះក៏ដោយ។

ទោះបីជាយ៉ាងណាក៏ដោយ លោក Medvedev បានសរសេរនៅលើ Telegram ថា “អ្វីដែលគួរឲ្យអាម៉ាស់បំផុតគឺ វេទិកា Davos កំពុងពិភាក្សាអំពី ការផ្តល់រថក្រោះទៅឲ្យអ៊ុយក្រែន”។

លោកបានចង្អុលបង្ហាញថា “ពីមុននៅ Davos ពួកគេបានពិភាក្សាអំពីរឿងផ្សេង ដូចជាសេដ្ឋកិច្ចជាដើម។ ក៏ល្អដែរ ដែលក្រុមហ៊ុនរុស្ស៊ី មិនចូលរួមព្រឹត្តិការណ៍ក្នុងឆ្នាំនេះ”។

កាលពីដើមសប្តាហ៍នេះ ចក្រភពអង់គ្លេសបានប្រកាសថា ខ្លួននឹងផ្តល់រថក្រោះប្រយុទ្ធសំខាន់ Challenger 2 ចំនួន១៤គ្រឿង។ ប្រទេសប៉ូឡូញ និងហ្វាំងឡង់ ក៏បាននិយាយផងដែរថា ពួកគេបានត្រៀមរួចជាស្រេច ដើម្បីផ្គត់ផ្គង់ឲ្យអ៊ុយក្រែន នូវរថក្រោះ Leopard 2 ដែលផលិតដោយអាល្លឺម៉ង់ ចេញពីស្តុកផ្ទាល់ខ្លួនរបស់ពួកគេ។

យ៉ាងណាក្តី រឿងនេះនឹងតម្រូវឲ្យមានការអនុញ្ញាតពីទីក្រុងបែរឡាំង ប៉ុន្តែរហូតមកដល់ពេលនេះ មិនទាន់ធ្វើការសម្រេចចិត្តនោះទេ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ មុនផ្ទុះសង្គ្រាម សេដ្ឋកិច្ច អ៊ុយក្រែន ពឹងផ្អែកខ្លាំងលើវិស័យទាំងនេះ