ការសិក្សា ៖ តំបន់ Greenland  ជួបសីតុណ្ហភាពក្ដៅបំផុតក្នុងរយៈពេល ១,០០០ ឆ្នាំ

តាមទិន្នន័យសិក្សាថ្មីពីអ្នកវិទ្យាសាស្ត្របានបង្ហាញថា សីតុណ្ហភាពជាមធ្យមនៅតំបន់ Greenland ដែលគ្របដណ្តប់ដោយទឹកកកនោះនៅសតវត្សនេះ បានជួបសីតុណ្ហភាពក្តៅបំផុតក្នុងរយៈពេល ១,០០០ ឆ្នាំ ដោយសារឥទ្ធិពលនៃការឡើងកម្ដៅផែនដី ។

ក្រុមស្រាវជ្រាវដឹកនាំដោយវិទ្យាស្ថាន Alfred Wegener ដែលមានមូលដ្ឋាននៅប្រទេសអាល្លឺម៉ង់បានប្រកាសពីការរកឃើញរបស់ខ្លួននៅក្នុងទស្សនាវដ្តីវិទ្យាសាស្ត្រ Nature កាលពីថ្ងៃពុធ ។

ក្រុមអ្នកវិទ្យាសាស្ត្របានធ្វើការវិភាគលើផ្ទាំងទឹកកករបស់ Greenland នៅផ្នែកកណ្តាល និងខាងជើងនៃកោះនេះ ដើម្បីពិនិត្យមើលការផ្លាស់ប្តូរសីតុណ្ហភាពពីជាង ១,០០០ ឆ្នាំមុនរហូតដល់ឆ្នាំ ២០១១ ។

ជាលទ្ធផល អ្នកស្រាវជ្រាវបានរកឃើញថា សីតុណ្ហភាពជាមធ្យមពីឆ្នាំ ២០០១ ដល់ឆ្នាំ ២០១១ គឺ ១.៥ អង្សាសេខ្ពស់ជាងនៅសតវត្សទី ២០ ។

ជាមួយគ្នានោះ អ្នកជំនាញនិយាយថា បើសិនជាទឹកកកនៅតំបន់នេះរលាយ នឹងធ្វើឲ្យនីវ៉ូទឹកសមុទ្រនៅលើភពផែនដីទាំងអស់កើនឡើងខ្ពស់ផងដែរ ៕

ប្រែសម្រួលដោយ ៖ នាង រតនៈ

ប្រភព ៖ NHK

ចុចអាន ៖ ដឹងទេ យន្តហោះដែលធ្លាក់នៅ នេប៉ាល់ មានអាយុកាលប៉ុន្មានឆ្នាំ?