រុស្ស៊ី ប្តេជ្ញាកម្ទេចរាល់សព្វាវុធ ដែលលោកខាងលិចបញ្ជូនទៅឲ្យ កងទ័ពអ៊ុយក្រែន (មានវីដេអូ)

ឯកអគ្គរដ្ឋទូតរុស្ស៊ីប្រចាំទីក្រុងវ៉ាស៊ីនតោន លោក Anatoly Antonov បាននិយាយនៅថ្ងៃព្រហស្បតិ៍ទី១៩ខែមករានេះថា កងទ័ពរុស្ស៊ីនឹង កម្ទេចរាល់សព្វាវុធ ដែលប្រទេសលោកខាងលិចបញ្ជូនទៅឲ្យកងទ័ពអ៊ុយក្រែន។

នៅពេលត្រូវបានស្នើឲ្យធ្វើអត្ថាធិប្បាយលើសេចក្តីថ្លែងការណ៍របស់អ្នកនាំពាក្យក្រសួងការបរទេសអាមេរិក Ned Price អំពីលទ្ធភាពរបស់កងកម្លាំងសន្តិសុខទីក្រុងកៀវ ក្នុងការប្រើអាវុធអាមេរិកវាយប្រហារនៅតំបន់គ្រីមៀ លោកបានឆ្លើយថា “វាគួរតែក្លាយជារឿងជាក់ស្តែងសម្រាប់មនុស្សគ្រប់គ្នា៖ មិនថាអាវុធដែលអាមេរិក ឬណាតូផ្គត់ផ្គង់ដល់រដ្ឋាភិបាលរបស់ប្រធានាធិបតីអ៊ុយក្រែនលោក Vladimir Zelensky ទេ យើងនឹងបំផ្លាញចោលទាំងអស់”។

លោកបានសង្កត់ធ្ងន់ថា “ការផ្តល់អាវុធឲ្យអ៊ុយក្រែន មិនថាដោយសហរដ្ឋអាមេរិក ឬប្រទេសណាតូផ្សេងទៀតនោះទេ វានឹងនាំឲ្យមានការកើនឡើងនៃចំនួនជនស៊ីវិលស្លាប់ និងរបួស ហើយបង្កើតការលំបាកបន្ថែមទៀត នៅក្នុងអតីតសាធារណរដ្ឋសូវៀតមួយនេះ”។

លោក Antonov បញ្ជាក់ថា “សូមគិតអំពីការលើកឡើងរបស់ប្រធានាធិបតីរុស្ស៊ីលោក វ្ល៉ាឌីមៀរ ពូទីន។ វាមិនអាចទៅរួចទេក្នុងការយកឈ្នះសហព័ន្ធរុស្ស៊ី។ ជ័យជម្នះនឹងក្លាយជារបស់យើង”៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ TASS

ចុចអាន៖ ណាតូ វាយបកភ្លាមៗ ក្រោយលោក ពូទីន ប្រកាសថា រុស្ស៊ីនឹងឈ្នះនៅអ៊ុយក្រែន