ត្រឹម ២ ថ្ងៃប៉ុណ្ណោះលោក Zelensky បាត់មនុស្សជំនិតៗ ខណៈប្រតិបត្តិការ​សឹករបស់ រុស្ស៊ី នៅតែបន្ត

ត្រឹមតែរយៈពេល ២ ថ្ងៃប៉ុណ្ណោះ លោកប្រធានាធិបតីអ៊ុយក្រែន Volodymyr Zelensky បានបាត់បង់មនុស្សជំនិតដែលធ្លាប់នៅក្បែរខ្លួនចំនួន ២ រូបក្នុងព្រឹត្តិការណ៍ផ្សេងៗគ្នា ស្របពេលដែលប្រតិបត្តិការសឹករបស់រុស្ស៊ីលើអ៊ុយក្រែនអូសបន្លាយពេលជិត ១ ឆ្នាំ ។

លោក Zelensky បានប្រកាសបាត់បង់ទីប្រឹក្សាផ្ទាល់របស់លោកគឺលោក Aleksey Arestovich បន្ទាប់ពីមន្ត្រីជាន់ខ្ពស់រូបនេះបានលាលែងពីតំណែង ក្រោយហេតុការណ៍ធ្លាក់មីស៊ីលលើអគារលំនៅដ្ឋានក្នុងទីក្រុង Dnepr ។

ការប្រកាសលាលែងពីតំណែងរបស់លោក Aleksey Arestovich កើតឡើង បន្ទាប់ពីលោកបានសារភាពផ្ទាល់មាត់ថា អគារលំនៅដ្ឋាននៅទីក្រុង Dnepr រងការខ្ទេចខ្ទី និងបានសម្លាប់មនុស្សរាប់សិបនាក់នោះ គឺដោយសារតែកងកម្លាំងអ៊ុយក្រែនបាញ់ទម្លាក់មីស៊ីលរបស់រុស្ស៊ី ទើបជាហេតុធ្វើឲ្យមីស៊ីលធ្លាក់លើអគារនោះតែម្ដង ។

រំលងបាន ១ ថ្ងៃ លោក Zelensky កាន់តែក្រពុលមុខ ដោយសារតែប្រធានាធិបតីអ៊ុយក្រែនរូបនេះបាត់មនុស្សជំនិតម្នាក់ទៀតគឺរដ្ឋមន្ត្រីមហាផ្ទៃលោក Denys Monastyrskyi ។

លោក Denys Monastyrskyi បានបាត់បង់ជីវិតក្នុងហេតុការណ៍ធ្លាក់ឧទ្ធម្ភាចក្រនៅតំបន់ Brovary ភាគខាងកើតទីកៀវកាលពីថ្ងៃទី១៨ ខែមករា ឆ្នាំ២០២៣ ដែលបានសម្លាប់មនុស្សចំនួន ១៨ នាក់ និងមនុស្សសរុប ២៦ នាក់រងរបួស ដោយក្នុងនោះមានកុមារ ១០ នាក់ផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ AP

ចុចអាន ៖ លោក Zelensky សុំឲ្យមេដឹកនាំពិភពលោកកុំគិតយូរក្នុងការជួយ អ៊ុយក្រែន ទប់ រុស្ស៊ី