អាមេរិក ចាប់អ្នករត់គេចខ្លួនក្នុងបទល្មើសផ្សេងៗជាង ៧៥,០០០ នាក់កាលពី​ឆ្នាំមុន

ទីភ្នាក់ងារអាមេរិក Marshals (USMS) បានចាប់អ្នករត់គេចខ្លួនក្នុងបទល្មើសផ្សេងៗជាង ៧៥,០០០ នាក់ក្នុងឆ្នាំ ២០២២ ដែលគិតជាមធ្យមមានការចាប់ខ្លួនច្រើនជាង ៣០០ នាក់ឯណោះក្នុងមួយថ្ងៃ ។

សេចក្តីថ្លែងការណ៍បានបង្ហាញថា USMS បានចាប់អ្នករត់គេចខ្លួនចំនួន ៧៥,៨៤៦ នាក់ក្នុងឆ្នាំ ២០២២ ខណៈ ២៨,៣២៤ នាក់គឺស្របតាមដីការបស់តុលាការសហព័ន្ធ ហើយគិតជាមធ្យមទីភ្នាក់ងារនេះចាប់ខ្លួនមនុស្សបាន ៣០៣ នាក់ក្នុងមួយថ្ងៃសម្រាប់ប្រតិបត្តិការបង្ក្រាបចំនួន ២៥០ ថ្ងៃ ។

នៅក្នុងប្រតិបត្តិការទាំងនោះ ទីភ្នាក់ងារ USMS ចាប់ខ្លួនមនុស្សចំនួន ៩,៩១១ នាក់​លើបទល្មើសផ្លូវភេទ, ៥,៧៥៩ នាក់ពាក់ព័ន្ធនឹងឃាតកម្ម ហើយក្នុងនោះក៏មានជនភៀសខ្លួនអន្តរជាតិជិត ១,៥០០​ នាក់ផងដែរ ។ មិនតែប៉ុណ្ណោះ មានជនល្មើសចំនួន ២ នាក់ក្នុងចំណោម ១៥ នាក់ ដែលប៉ូលិសតាមចាប់បំផុតនោះក៏ត្រូវបាន USMS ចាប់បានផងដែរ ។

លើសពីនេះទៀត ទីភ្នាក់ងារ USMS ក៏បានរឹបអូសអាវុធជាង ៦,២០០ ក្នុងអំឡុងពេលកាត់បន្ថយអំពើហិង្សា និងប្រតិបត្តិការប្រឆាំងក្រុមទំនើងកាលពីឆ្នាំមុន ជាពិសេសទីភ្នាក់ងារនេះបានជួយសង្គ្រោះកុមារដែលបាត់ខ្លួនចំនួន ៤២៤ នាក់ ស្របតាមសិទ្ធិអំណាចរបស់ពួកគេក្រោមច្បាប់យុត្តិធម៌សម្រាប់ជនរងគ្រោះនៃការជួញដូរ ។

គួរបញ្ជាក់ថា ចាប់តាំងពីការអនុម័តច្បាប់បញ្ជាក់ពីសិទ្ធិអំណាចក្នុងខែឧសភា ឆ្នាំ ២០១៥ មក, ទីភ្នាក់ងារ USMS បានរួមចំណែកដល់ការជួយសង្គ្រោះកុមារដែលបាត់ខ្លួនជាង ២,៧០០ នាក់ ៕

ប្រែសម្រួលដោយ ៖ នាង រតនៈ

ប្រភព ៖ Sputnik

ចុចអាន ៖ លោក បៃដិន តែងតាំងឯកអគ្គរដ្ឋទូតសិទ្ធិមនុស្សប្រចាំ កូរ៉េខាងជើង ក្រោយ កៅអីនេះទំនេរជិត ៦ ឆ្នាំ