ព័ត៌មានអន្ដរជាតិ

ឡាវ លុបចោល MOU ជាមួយក្រុមហ៊ុនសាងសង់ផ្លូវល្បឿនលឿន ចិន ក្រោយគម្រោងមិនចេញផ្លែផ្កា

បានផុស

២ years មុន

នៅ

ថ្ងៃអង្គារ ២៤ មករា ២០២៣

ដោយ

រដ្ឋាភិបាលឡាវបានប្រកាសលុបចោលអនុសារណៈនៃការយោគយល់ (MOU) ជាមួយក្រុមហ៊ុនសាងសង់របស់ចិន Yunnan Construction ដែលធ្វើការសិក្សាលទ្ធភាពសាងសង់ផ្លូវល្បឿនលឿន ២ ខ្សែ ពីវ៉ាងវៀងទៅខេត្តឧដុមសៃ ដោយសារ MOU នេះ បានបន្តអាយុចំនួន ៣ លើកមកហើយ ប៉ុន្តែមិនមានសញ្ញាដំណើរការណាមួយនៅឡើយ ពោលគឺរដ្ឋាភិបាលឡាវត្រៀមរកក្រុមហ៊ុនថ្មីដើម្បីជំនួសហើយ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រព័ន្ធផ្សព្វផ្សាយរបស់រដ្ឋាភិបាលឡាវបានរាយការណ៍កាលពីពេលថ្មីៗនេះថា ការសាងសង់ផ្លូវល្បឿនលឿនភាគខាងជើងចំនួន ៣ ដំណាក់កាលដែលរដ្ឋាភិបាលឡាវ ក៏ដូចជាក្រសួងផែនការ និងការវិនិយោគឡាវ គ្រោងនឹងសាងសង់ផ្លូវល្បឿនលឿនពីទីក្រុងវៀងច័ន្ទ-វាំងវៀង បន្តរហូតដល់ព្រំដែនឡាវ-ចិន (ទីក្រុងបរទែនខេត្តហ្លួងណាំថា) មកដល់ពេលនេះនៅតែគ្មានការវិវត្តទៅមុខនៅឡើយ ដែលធ្វើឲ្យខាងក្រសួងផែនការ និងការវិនិយោគឡាវ សម្រេចស្វែងរកក្រុមហ៊ុនវិនិយោគថ្មី ដើម្បីមកសិក្សាលទ្ធភាពនៃគម្រោងនេះជំនួសក្រុមហ៊ុនចាស់ ។

កន្លងមកក្រសួងផែនការ និងការវិនិយោគឡាវ បានចុះហត្ថលេខាលើ MOU ជាមួយក្រុមហ៊ុន Yunnan Construction and Investment Holding Group មកពីខេត្តយូណានប្រទេសចិន ដើម្បីសិក្សាលទ្ធភាពលើគម្រោងសាងសង់ផ្លូវល្បឿនលឿននេះ ដោយចែកចេញជា ៣ ដំណាក់កាល គឺដំណាក់កាលទី១៖ ពីវាំងវៀង-ហ្លួងព្រះបាង មានចម្ងាយ ១៣៦.៩ គីឡូម៉ែត្រ, ដំណាក់កាលទី២៖ ពីហ្លួងព្រះបាង-ឧដុមសៃ មានចម្ងាយ ១១៣.៩ គីឡូម៉ែត្រ និងដំណាក់កាលទី៣ ពីឧដុមសៃ-បរទែន មានចម្ងាយ ៨១.០៩ គីឡូម៉ែត្រ ។

ក្រុមហ៊ុន Yunnan Construction and Investment គឺជាក្រុមហ៊ុនសម្បទានសាងសង់ផ្លូវល្បឿនលឿនដំបូងគេរបស់ឡាវពីទីក្រុងវៀងច័ន្ទទៅវាំងវៀង ដែលត្រូវបានបើកឲ្យដំណើរការជាផ្លូវការតាំងពីថ្ងៃទី២០ ខែធ្នូ ឆ្នាំ២០២០ ហើយពីពេលនោះមក រដ្ឋាភិបាលឡាវបានបន្តអាយុកាលកិច្ចសន្យាឲ្យក្រុមមួយនេះចំនួន ៣ លើកមកហើយ ប៉ុន្តែគម្រោងសាងសង់ផ្លូវល្បឿនលឿននេះ មិនបានចេញផ្លែផ្កាអ្វីឡើយ ។

ដូច្នេះដើម្បីឲ្យផ្លូវល្បឿនលឿននេះបានសាងសង់ឡើងតាមការគ្រោងទុក ទើបការិយាល័យនាយករដ្ឋមន្ត្រីបានសម្រេចលុបចោល MOU លើគម្រោងសាងសង់ផ្លូវល្បឿនលឿន ពីវាំងវៀង ទៅហ្លួងព្រះបាង និងពីហ្លួងព្រះបាង ទៅខេត្តឧដុមសៃ ពោលគឺនឹងត្រូវជ្រើសរើសក្រុមហ៊ុនថ្មីមកជំនួសវិញ ។

ប៉ុន្តែចំពោះផ្លូវល្បឿនលឿនពីខេត្តឧដុមសៃទៅបរទែន(ព្រំដែនចិន) នៅតែប្រគល់សិទ្ធិឲ្យក្រុមហ៊ុនខាងលើដើម្បីដំណើរការសាងសង់ដដែល ដោយសារតែក្រុមហ៊ុននេះបានសិក្សា និងរៀបចំដំណើរការសាងសង់រួចហើយ ប៉ុន្តែត្រូវមានការកំណត់ពេលវេលាឲ្យបានច្បាស់លាស់សម្រាប់ការសាងសង់ជាថ្មី ៕

ប្រែសម្រួលដោយ ៖ គង់ សំអាន

ប្រភព ៖ MGR Online

ចុចអាន ៖ សីតុណ្ហភាពនៅភាគខាងជើងប្រទេសចិន ចុះត្រជាក់បំផុត -53 អង្សាសេ