កូរ៉េទាំង២ ចេញការព្រមានអំពីអាកាសធាតុ ចុះត្រជាក់ខ្លាំង

អាជ្ញាធរ​កូរ៉េ​ខាងជើង ​បាន​ព្រមានអំ​ពី​លក្ខខណ្ឌ​អាកាសធាតុ​មិនអំណាយផល ​ក្នុង​ប្រទេស​ខណៈ​រលក​ត្រជាក់ បាន​បោកបក់​លើ​ឧបទ្វីប​កូរ៉េ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វិទ្យុរដ្ឋបានផ្សាយថា សីតុណ្ហភាពទំនងជាធ្លាក់ចុះដល់ -30អង្សាសេ នៅក្នុងតំបន់ភាគខាងជើង ដែលជាតំបន់ក្រីក្របំផុតរបស់ប្រទេសនេះ។

យោងតាមប្រព័ន្ធផ្សព្វផ្សាយរដ្ឋ តំបន់ឆ្នេរសមុទ្រ ក៏ត្រូវបានគេរំពឹងថា នឹងមានខ្យល់បក់ខ្លាំងផងដែរ។

ចំណែកប្រទេសកូរ៉េខាងត្បូងឯណោះវិញ ​ក៏បាន​ចេញ​ការព្រមាន​អំពី​រលកអាកាសធាតុ​ត្រជាក់ផងដែរ ខណៈ​ភាគ​ខាងជើង​​ប្រទេស​ចិន​បាន​និង​កំពុង​ជួបប្រទះ​សីតុណ្ហភាព​ទាប​បំផុត​រួចទៅហើយ។

សីតុណ្ហភាព ក៏ត្រូវបានគេរំពឹងថានឹងធ្លាក់ចុះដល់កម្រិតទាបបំផុតក្នុងរយៈពេលមួយទសវត្សរ៍ផងដែរ ក្នុងប្រទេសជប៉ុននៅសប្តាហ៍នេះ។

ថ្វីបើប្រទេសកូរ៉េខាងជើង ត្រូវរងផលប៉ះពាល់ដោយសារអាកាសធាតុធ្ងន់ធ្ងរ ឬអាក្រក់ដូចជាកន្លែងផ្សេងទៀតក៏ដោយ ប៉ុន្តែគេមិនសូវដឹងអំពីផលប៉ះពាល់លើប្រជាជនរបស់ពួកគេទេ។

Ryanggang, North Hamgyong និង South Hamgyong ដែលជាខេត្តក្រីក្របំផុតរបស់ប្រទេស និងជាខេត្តងាយរងគ្រោះបំផុតដោយគ្រោះមហន្តរាយអាកាសធាតុ គឺសុទ្ធតែមានទីតាំងនៅភាគខាងជើង។

អ្នកវិទ្យាសាស្ត្រនិយាយថា អាកាសធាតុអាក្រក់ រួមទាំងរលកត្រជាក់ កំពុងក្លាយជារឿងធម្មតា ដោយសារតែបម្រែបម្រួលអាកាសធាតុ។

ការ​ប្រកាស​អាសន្នអំពី​រលក​ត្រជាក់​នៅ​ថ្ងៃ​អង្គារនេះ ​កើត​ឡើង​ខណៈទី​ក្រុង​ព្យុងយ៉ាង ​ត្រៀម​ប្រារព្ធ​ខួប​លើក​ទី៧៥ នៃ​កងទ័ព​ប្រជាជន​កូរ៉េ​នៅ​សប្តាហ៍​ក្រោយ៕

ប្រែសម្រួល៖ Vann Vann

ប្រភព៖ BBC

ចុចអាន៖ សីតុណ្ហភាពនៅភាគខាងជើងប្រទេសចិន ចុះត្រជាក់បំផុត -53 អង្សាសេ