ក្រសួងអប់រំ ថៃ លែងកំណត់ម៉ូដសក់សិស្សសាលាទៀតហើយ តែត្រូវ​សមរម្យ

កាលពីពេលថ្មីៗនេះក្រសួងអប់រំថៃបានចេញសេចក្ដីប្រកាសអំពីការលែងកំណត់ម៉ូដសក់ចំពោះសិស្សសាលាទៀតហើយ ដោយច្បាប់ថ្មីនេះចែងថា ក្រសួងបានអនុញ្ញាតឲ្យស្ថាប័ន និងគ្រឹះស្ថានសិក្សាកំណត់របៀបម៉ូតសក់សិស្សសាលាដែលស្ថិតក្រោមការគ្រប់គ្រងដោយខ្លួនឯង ប៉ុន្តែត្រូវតែស្អាត និងមានភាពសមរម្យ ។

រដ្ឋមន្ត្រីក្រសួងអប់រំថៃ លោកស្រី Treenuch Thienthong បាននិយាយកាលពីថ្ងៃអង្គារ ទី២៤ ខែមករា ឆ្នាំ២០២៣ ថា សិស្សនៅក្នុងសាលារៀនដែលស្ថិតនៅក្រោមបន្ទុករបស់ក្រសួងអប់រំ នឹងត្រូវបានអនុញ្ញាតឲ្យមានសក់ខ្លី ឬវែងតាមដែលពួកគេចូលចិត្ត ប៉ុន្តែមិនត្រូវហួសហេតុពេកទេ ។

ការកែប្រែច្បាប់ថ្មីនេះកើតឡើង បន្ទាប់ពីមានការតវ៉ាជាហូរហែនាពេលកន្លងមក ពីសំណាក់ក្រុមសិស្សវិទ្យាល័យដែលដាក់ឈ្មោះថា “Bad Student” លើការអនុវត្តវិន័យរបស់ក្រសួងអប់រំដែលមានអាយុកាលចាស់វស្សាទៅហើយនោះ ។

ច្បាប់ចាស់ដែលក្រសួងអប់រំថៃបានអនុវត្ត​ចែង​ថា សម្រាប់​សិស្សថ្នាក់ទី៧ ទី៨ និងទី៩ សិស្ស​ប្រុស​ត្រូវ​កាត់សក់​ឲ្យ​ខ្លី​ស្មើៗ​គ្នា ដោយ​សក់​ខាង​មុខ​មិន​លើស​ពី ៣ ​សង់ទីម៉ែត្រឡើយ ហើយចំណែកសិស្ស​ស្រី​ត្រូវ​កាត់សក់ឲ្យ​ស្មើ​គ្នារហូតដល់​គល់​ត្រចៀក ខណៈសម្រាប់សិស្សស្រីថ្នាក់ទី១០ ទី១១ និងទី១២ ត្រូវកាត់សក់​ក្រោម​ត្រចៀក​ប្រវែង ៤ សង់ទីម៉ែត្រ ៕

ប្រែសម្រួលដោយ ៖ ជីវ័ន្ត

ប្រភព ៖ Thai PBS / Thailand News

ចុចអាន ៖ ដឹងទេ វៀតណាម មិនធ្លាប់ជួបរឿងប្រធានាធិបតីលាលែងពីតំណែងពាក់ កណ្ដាលទី តាំងពីឆ្នាំណាមក?