ឆ្នាំ ២០២២ ថៃ ទាញភ្ញៀវទេសចរបរទេសបានជាង ១១ លាននាក់ 

យោងទៅតាមទិន្នន័យពីក្រសួងទេសចរណ៍ប្រទេសថៃដែលបង្ហាញកាលពីថ្ងៃអង្គារ ទី២៤ ខែមករា ឆ្នាំ ២០២៣ បានឲ្យដឹងថា គិតត្រឹមក្នុងឆ្នាំ ២០២២ ថៃទទួលភ្ញៀវបរទេសចំនួន ១១.១៥ លាននាក់ ពោលច្រើនជាងឆ្នាំ ២០២១ ដែលមានចំនួនតែ ៤២៨,០០០ នាក់ប៉ុណ្ណោះ ។ 

គ្រាន់តែនៅក្នុងខែធ្នូ ឆ្នាំ ២០២២ មានភ្ញៀវទេសចរបរទេសចំនួន ២.២៤ លាននាក់ បើធៀបនឹងខែធ្នូ ឆ្នាំ២០២១ មានតែ ២៣០,៤៩៧ នាក់ប៉ុណ្ណោះ ។ ដូច្នេះតួលេខនេះបង្ហាញឲ្យឃើញថា រដ្ឋាភិបាលថៃសម្រេចបានគោលដៅភ្ញៀវទេសចរដ៏ធំធេងមួយ នៅពេលដែលប្រទេសនេះព្យាយាមស្តារឡើងវិញនូវឧស្សាហកម្មទេសចរណ៍ដ៏សំខាន់របស់ខ្លួន ។

បើទោះជាយ៉ាងណាក៏ដោយ ចំនួននេះក៏មិនទាន់អាចឈានដល់គោលដៅមុនជំងឺរាតត្បាតឆ្នាំ ២០១៩ នោះទេ ដោយនៅពេលនោះគេសង្កេតឃើញកំណត់ត្រានៃភ្ញៀវទេសចរបរទេសឡើងជិត ៤០ លាននាក់ក្នុងមួយឆ្នាំពេញឯណោះ ។

ក្រសួងទេសចរណ៍ថៃបាននិយាយទៀតថា សម្រាប់ឆ្នាំ ២០២៣ នេះរដ្ឋាភិបាលថៃដាក់គោលដៅនឹងមានភ្ញៀវអន្តរជាតិដល់ទៅ ២៥ លាននាក់ ក្នុងនោះមានទេសចរចិនយ៉ាងហោចណាស់ ៥ លាននាក់ ដែលជាប្រភពទីផ្សារដ៏ធំបំផុតចំពោះប្រទេសថៃ ។ 

ស្របពេលជាមួយគ្នានេះ រដ្ឋាភិបាលថៃក៏បានសម្រេចអនុម័តថវិកាចំនួន ៣.៩៥ ពាន់លានបាត ដើម្បីជំរុញការធ្វើដំណើរក្នុងស្រុក និងទេសចរណ៍អន្តរជាតិនៅក្នុងទីក្រុងបន្ទាប់បន្សំផងដែរ ៕

ប្រែសម្រួលដោយ ៖ វារី

ប្រភព ៖ Asian One

ចុចអាន ៖ ក្រសួងអប់រំ ថៃ លែងកំណត់ម៉ូដសក់សិស្សសាលាទៀតហើយ តែត្រូវ​សមរម្យ