មិនគួរឲ្យជឿ ក្រពើពាំសពក្មេងលង់ទឹក ទៅឲ្យមនុស្សវិញនៅ ឥណ្ឌូណេស៊ី

នេះជាការពិតមិនគួរឲ្យជឿមួយកើតឡើងនៅប្រទេសឥណ្ឌូណេស៊ី ដើមហេតុគឺមានក្មេងប្រុសម្នាក់ឈ្មោះ  Ziyad Wijaya អាយុ ៤ ឆ្នាំ បានលង់ទឹក និងបាត់ខ្លួនជិតមាត់ទន្លេជ្វា ខេត្តកាលីម៉ាន់តាន់ភាគខាងកើតកាលពីថ្ងៃទី២៣ ខែមករា ឆ្នាំ២០២៣ ។

បន្ទាប់ពីរយៈពេល ២ ថ្ងៃក្រោយមក ទើបអ្នកស្រុកប្រទះឃើញកុមារារូបនេះត្រូវក្រពើមួយក្បាលប្រវែង ១០ ហ្វីតហែលនាំមកវិញនៅទន្លេ Mahakam កោះ Borneo ចម្ងាយ ១ ម៉ាយពីកន្លែងដែលគេបានបាត់ខ្លួន ។

គ្រានោះអ្នកនេសាទមានការងឿងឆ្ងល់ជាខ្លាំង ព្រោះឃើញក្រពើកំពុងហែលសំដៅមកទូករបស់ខ្លួន រួចទម្លាក់សាកសពក្មេងប្រុសម្នាក់ក្បែរទូក ហើយលឹបចូលទឹកវិញទៅ ។ បន្ទាប់ពីធ្វើការពិនិត្យសាកសពចប់ គេមិនមានរកឃើញស្នាមខាំពីក្រពើឡើយសូម្បីតែបន្តិច ។

ពាក់ព័ន្ធនឹងបញ្ហាខាងលើ សមាជិកនៃទីភ្នាក់ងារស្វែងរក និងជួយសង្គ្រោះកាលីម៉ាន់តាន់ភាគខាងកើតបានទទួលព័ត៌មានថា កូនប្រុសដែលក្រពើនាំមកពិតជាក្មេងដែលគេកំពុងស្វែងរកពិតមែន។

តាមធម្មតាក្រពើតែងសម្លាប់មនុស្សប្រហែល ១ ពាន់នាក់ជារៀងរាល់ឆ្នាំ ជាពិសេសក្នុងតំបន់ដែលកុមារាតូចនោះលង់ទឹក គឺសម្បូរករណីក្រពើវាយប្រហារច្រើនជាងគេបំផុត។ បើយោងទៅតាម ResearchGate បានបញ្ជាក់ដែរថា មានការវាយប្រហារដោយសត្វក្រពើចំនួន ២២១ ដងនៅ Borneo ចន្លោះឆ្នាំ ២០០៧ និង ២០១៦ បណ្តាលឱ្យមនុស្សចំនួន ១២៩ នាក់បាត់បង់ជីវិតទៀតផង ៕

ប្រែសម្រួលដោយ ៖ វារី

ប្រភព៖dailymail

ចុចអាន ៖ ការពិតគួរឲ្យចាប់អារម្មណ៍ ១០ យ៉ាងពី សត្វក្រពើ