សាកសពម៉ាំមី បិទពេញដោយសន្លឹកមាស ត្រូវបានរកឃើញនៅ​ អេហ្ស៊ីប

បុរាណវិទូមួយក្រុម បានរកឃើញសាកសពម៉ាំមីដែលបិទពេញដោយសន្លឹកមាស នៅខាងក្នុងមឈូសថ្ម ដែលមិនធ្លាប់បើកសោះអស់រយៈពេល ៤៣០០ឆ្នាំមកហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សាកសពម៉ាំមី ដែលជាសពរបស់បុរសឈ្មោះ Hekashepes ត្រូវបានគេគិតថា ជាសពមិនមែនជាប់សែរាជវង្ស មានអាយុកាលចាស់ជាងគេបំផុតនៅក្នុងប្រទេសអេហ្ស៊ីប។

សាកសពនេះ ត្រូវបានគេរកឃើញក្នុងជម្រៅ១៥ម៉ែត្រ នៅទីបញ្ចុះសព Saqqara ភាគខាងត្បូងទីក្រុង គែរ ជាកន្លែងដែលផ្នូរចំនួនបីផ្សេងទៀតក៏ត្រូវបានរកឃើញផងដែរ។

ក្រៅពីសាកសព វត្ថុ​ជា​ច្រើន​ទៀត រួម​ទាំង​គ្រឿង​ស្មូន ក៏​ត្រូវ​បាន​គេ​រក​ឃើញផងដែរទីនោះ។

បុរាណវិទូឈ្មោះ Zahi Hawass អតីតរដ្ឋមន្ត្រីក្រសួងវត្ថុបុរាណរបស់ប្រទេសអេហ្ស៊ីប បាននិយាយថា ការរកឃើញទាំងអស់នេះ គឺជាវត្ថុនៅប្រហែលសតវត្សរ៍ទី២៥ ដល់សតវត្សរ៍ទី២២ មុនគ.ស។

ចំណែក Ali Abu Deshish ដែលជាបុរាណវិទូម្នាក់ទៀត ចូលរួមក្នុងការជីកកកាយនេះបាននិយាយថា “ការរកឃើញនេះគឺមានសារសំខាន់ណាស់ ព្រោះវាអាចឲ្យយើងដឹងអំពីទំនាក់ទំនងរវាងស្តេច ជាមួយប្រជាជនដែលរស់នៅជុំវិញ”។

គួរបញ្ជាក់ថា Saqqara គឺជាទីបញ្ចុះសពសកម្ម អស់រយៈពេលជាង៣០០០ឆ្នាំមកហើយ ហើយជាតំបន់បេតិកភណ្ឌពិភពលោករបស់អង្គការយូណេស្កូ និងសម្បូរទៅដោយប្រាសាទពីរ៉ាមីដ៕

ប្រែសម្រួល៖ Vann Vann

ប្រភព៖ BBC

ចុចអាន៖ អ្នកបុរាណវិទ្យា ប៉េរូ រកឃើញសាកសពខ្មោចម៉ាំមីអាយុកាល ៨០០ ឆ្នាំ