រុស្ស៊ី គំរាមជម្លោះនឹងរីកធំជាងមុន បើ អ៊ុយក្រែន ទទួលបានមីស៊ីលរយៈ​ចម្ងាយឆ្ងាយ

អ្នកនាំពាក្យវិមានក្រឹមឡាំង លោក Dmitry Peskov បាននិយាយនៅក្នុងសន្និសីទសារព័ត៌មានមួយថា ការបញ្ជូនមីស៊ីលរយៈចម្ងាយឆ្ងាយទៅឲ្យអ៊ុយក្រែន នឹងបង្កើនកម្រិតជម្លោះដោយផ្ទាល់កាន់តែរីកធំជាងមុនទៅទៀត ហើយរុស្ស៊ីក៏នឹងចាត់វិធានការចាំបាច់ផងដែរ ។

លោកបាននិយាយថា “យើងឃើញពីរបៀបដែលហេដ្ឋារចនាសម្ព័ន្ធយោធាទាំងមូលរបស់ណាតូកំពុងធ្វើការប្រឆាំងនឹងរុស្ស៊ី ហើយយើងក៏ឃើញពីរបៀបដែលហេដ្ឋារចនាសម្ព័ន្ធស៊ើបការណ៍សម្ងាត់ទាំងមូលរបស់ណាតូ រួមទាំងក្រុមឈ្លបយកការណ៍ និងក្រុមផ្កាយរណប កំពុងធ្វើការ ២៤ ម៉ោងក្នុងមួយថ្ងៃដើម្បីបម្រើផលប្រយោជន៍ដល់អ៊ុយក្រែន” ។

លោកបានបន្ថែមថា សកម្មភាពបែបនេះកំពុងបង្កើតលក្ខខណ្ឌកាន់តែ “ចម្លែក និងអរិភាព” សម្រាប់រុស្ស៊ី ដែលធ្វើឲ្យទីក្រុងមូស្គូមិនអាចព្រងើយកន្តើយបានឡើយ ។

ការព្រមានរបស់លោក Peskov បានកើតឡើង បន្ទាប់ពីប្រធានាធិបតីអ៊ុយក្រែនលោក Volodymyr Zelensky សុំឲ្យសម្ព័ន្ធមិត្តណាតូបញ្ជូនមីស៊ីលរយៈចម្ងាយឆ្ងាយ ក៏ដូចជាយន្តហោះចម្បាំងជំនាន់ទី ៤ និងនាវាមុជទឹកមកកាន់ប្រទេសដែលកំពុងហែកហួរដោយសង្គ្រាមមួយនេះ ដើម្បីទប់ទល់នឹងកងទ័ពរុស្ស៊ី ។

គួរបញ្ជាក់ថា កាលពីពេលថ្មីៗនេះអាមេរិកប្រកាសនឹងបញ្ជូនរថក្រោះប្រយុទ្ធ M1 Abrams ចំនួន ៣១ គ្រឿងឲ្យអ៊ុយក្រែន ខណៈអាល្លឺម៉ង់ក៏នឹងផ្ដល់រថក្រោះខ្លារខិន Leopard 2 ប្រមាណជា ១៤ គ្រឿងទៅដល់រដ្ឋាភិបាលទីក្រុងកៀវផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ រុស្ស៊ី ព្រមាន អ៊ុយក្រែន ប្រយ័ត្នផ្ទុះសង្គ្រាមសាសនាដ៏ធំមួយទៀតនៅ អឺរ៉ុប