ចិន ជោគជ័យបង្កាត់ពូជគោផលិតទឹកដោះបាន ១០០ តោនក្នុងមួយជីវិតរបស់វា

អ្នកវិទ្យាសាស្ត្រចិន​បានធ្វើការបង្កាត់ពូជគោខ្លាំងៗចំនួន ៣ ក្បាលដោយជោគជ័យ ដែលអាចផលិតទឹកដោះច្រើនមិនធម្មតា ដែលជារបកគំហើញថ្មីមួយទៀតសម្រាប់ឧស្សាហកម្មទឹកដោះគោចិន ដើម្បីកាត់បន្ថយការពឹងផ្អែកលើពូជនាំចូល ។

គោទាំង ៣ ក្បាលនេះ ត្រូវបានអ្នកវិទ្យាសាស្ត្រមកពីវិទ្យាស្ថានកសិកម្ម និងរុក្ខាប្រមាញ់នៃសាកលវិទ្យាល័យ Northwest ចម្លងហ្សេនចេញពី​ពូជគោ Holstein Friesian មានដើមកំណើតនៅប្រទេសហូឡង់ ដែលវាមានសមត្ថភាពផលិតទឹកដោះ ១៨ តោនក្នុងមួយឆ្នាំ ឬដល់ ១០០ តោនក្នុងមួយជីវិតរបស់វា ។

បើយោងតាមសារព័ត៌មាន Technology Daily បានឲ្យដឹងថា ចំពោះការចម្លងហ្សេងនេះដែរ អ្នកវិទ្យាសាស្ត្របានបង្កើតអំប្រ៊ីយ៉ុងបង្កាត់ចំនួន ១២០ ចេញពីកោសិកាត្រចៀករបស់សត្វគោ ហើយដាក់វានៅក្នុងគោពពោះជំនួស ។

លោក Jin Yaping ដែលជាអ្នកវិទ្យាសាស្ត្រដឹកនាំនៃគម្រោងនេះ បាននិយាយថា មានតែគោ ៥ ក្បាលប៉ុណ្ណោះ ក្នុងចំណោម ១០,០០០ ក្បាលនៅក្នុងប្រទេសចិន ដែលអាចផលិតទឹកដោះគោបាន ១០០ តោនក្នុងមួយជីវិតរបស់ពួកគេ ខណៈពូជគោថ្មីនេះនឹងក្លាយជាធនធានដ៏មានតម្លៃសម្រាប់ការបង្កាត់ពូជជាមួយគោផ្សេង ។

ទន្ទឹមនឹងនេះ ចិន​ គ្រោងនឹងចំណាយពេលពី ២ ទៅ ៣ ឆ្នាំ ដើម្បីបង្កើតពូជគោប្រភេទនេះប្រមាណ ១,០០០ ក្បាល ដើម្បីដោះស្រាយការពឹងផ្អែកនាំចូលគោទឹកដោះពីបរទេស ខណៈ ៧០ ភាគរយនៃគោទឹកដោះចិន គឺត្រូវបាននាំចូលពីបរទេស ។

គួរបញ្ជាក់ថា មួយរយៈចុងក្រោយនេះ ​ចិន​មាន​ការ​រីក​ចម្រើន​យ៉ាង​ខ្លាំង​ក្នុង​ការ​ចម្លងហ្សេន​សត្វ​​​ ខណៈកាល​ពី​ឆ្នាំ​មុន ក្រុមហ៊ុន​ចម្លងហ្សេនសត្វ​របស់​ចិន​បាន​បង្កើត​ឆ្កែ​ចចក​អាកទិក​ដំបូង​គេ​បង្អស់​របស់​ពិភពលោក ហើយក្នុងឆ្នាំ ២០១៧ ចិន ក៏ផលិតបានគោក្របីដែលមានភាពធន់នឹងជំងឺរបេងផងដែរ ៕

ប្រែសម្រួលដោយ ៖ នាង​ រតនៈ

ប្រភព ៖ CNN

ចុចអាន ៖ លោក ប្រាយុទ្ធ ចង់ឲ្យប្រជាជនថៃ ធ្វើការពីផ្ទះ ខណៈខ្យល់ពុល ឈានដល់កម្រិតគ្រោះថ្នាក់ ទូទាំងប្រទេស