តំបន់ប៉ះពាល់ក្នុងគ្រោះរញ្ជួយដីនៅ តួកគី ធំជាងផ្ទៃដីសរុបប្រទេសលីបង់ ២ ដង

បើយោងតាមភូគព្ភវិទូលីបង់បានឲ្យដឹងថា តំបន់រងផលប៉ះពាល់នៃគ្រោះរញ្ជួយដីដែលបានវាយប្រហារខេត្តចំនួន ១០ នៅភាគខាងត្បូងប្រទេសតួកគីកាលពីដើមសប្ដាហ៍នេះ គឺធំជាង ២ ដងនៃផ្ទៃដីសរុបរបស់ប្រទេសលីបង់ ។

លោក Tony Nemer អ្នកភូគព្ភវិទូនៅសាកលវិទ្យាល័យ Beirut American ក្នុងរដ្ឋធានីលីបង់បានប្រាប់សារព័ត៌មាន Anadolu ថា “ទីតាំងរបស់ខ្សែបន្ទាត់ដែលបានប្រេះ និងបង្កជាគ្រោះរញ្ជួយដីនៅតួកគីមានប្រវែងជិត ៣៥០ គីឡូម៉ែត្រ ខណៈផ្ទៃដីសរុបរបស់ប្រទេសលីបង់មានចំនួន ១០,៤៥២ គីឡូម៉ែត្រការ៉េ” ។

ដោយឡែកយោងតាមអនុប្រធានាធិបតីតួកគីលោក Fuat Oktay បាននិយាយនៅថ្ងៃសុក្រនេះថា សម្រាប់តែក្នុងប្រទេសតួកគី ចំនួនមនុស្សស្លាប់បានកើនឡើងដល់ ១៧,៦៧៤ នាក់ហើយ ខណៈអ្នករងរបួសវិញមានចំនួនរហូតដល់ ៧២,៨៧៩ នាក់ ។

ចំណែកក្រុមមួកសបានឲ្យដឹងថា នៅក្នុងប្រទេសស៊ីរី មនុស្សយ៉ាងតិច ៣,៣៧៧ នាក់បានស្លាប់ ក្នុងនោះ ២,០៣០ នាក់ស្លាប់ក្នុងតំបន់កាន់កាប់ដោយក្រុមឧទ្ទាមនៅភាគពាយព្យ ខណៈ ១,៣៤៧ នាក់បានស្លាប់នៅក្នុងតំបន់ដែលគ្រប់គ្រងដោយរដ្ឋាភិបាលនៃប្រទេសស៊ីរី ។

គួរបញ្ជាក់ថា គ្រោះមហន្តរាយនៅប្រទេសតួកគី និងស៊ីរីបានក្លាយជាការរញ្ជួយដីសម្លាប់មនុស្សច្រើនបំផុតរបស់ពិភពលោក្នុងរយៈពេលជាង ១ ទសវត្សរ៍មកនេះ ខណៈរហូតមកដល់ពេលនេះចំនួនមនុស្សស្លាប់បានកើនលើស ២ ម៉ឺននាក់ហើយ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ទារិកាជីវិតថ្លៃកើតក្រោមគំនរបាក់បែក ត្រូវគេដាក់ឈ្មោះឲ្យ ខណៈមនុស្សរាប់ពាន់នាក់ សុំយកទៅចិញ្ចឹម