ប្រជាជនគុយវ៉ែត រៃអង្គាសប្រាក់ ៦៧លានដុល្លារ ជួយជនរងគ្រោះនៅ តួកគី

ប្រទេសគុយវ៉ែតរៃអង្គាសប្រាក់បានចំនួន ២០លានឌីណាគុយវ៉ែត (៦៧លានដុល្លារ) សម្រាប់ជួយដល់ជនរងគ្រោះក្នុងហេតុការណ៍រញ្ជួយដី ដែលបានវាយប្រហារប្រទេសតួកគី និងស៊ីរី កាលពីសប្ដាហ៍មុន។

ប្រភពពីសារព័ត៌មានបានឱ្យដឹងថា មនុស្សជាង ១២៩,០០០នាក់បានចូលរួមក្នុងការបរិច្ចាគជាមួយក្រសួងសង្គមកិច្ចរបស់ប្រទេសគុយវ៉ែត ដែលមូលនិធិត្រូវបានដាក់ឱ្យដំណើរការក្នុងបំណងជួយជនរងគ្រោះនៅប្រទេសតួកគី និងស៊ីរី ។

បន្ទាប់ពីប្រកាសរៃអង្គាស សប្បុរសជននានបានចូលរួមបរិច្ចាគបានទឹកប្រាក់សរុប ៦៧លានដុល្លារ ហើយអំឡុងពេលផ្ដល់បទសម្ភាសន៍ជាមួយទូរទស្សន៍រដ្ឋ រដ្ឋមន្ត្រីការបរទេស លោក Sheikh Salem Abdullah Al-Jaber Al-Sabah បានថ្លែងអំណរគុណដល់ម្ចាស់ជំនួយទាំងអស់។

ជាមួយគ្នាដែរ ប្រទេសអារ៉ាប់ចំនួន ១៦ បានប្រកាសអំពីការផ្តល់ជំនួយសង្គ្រោះបន្ទាន់ និងជំនួយផ្នែកវេជ្ជសាស្រ្តដើម្បីគាំទ្រដល់ប្រទេសតួកគី ដែលប្រទេសទាំងនោះរួមមាន អារ៉ាប៊ីសាអូឌីត កាតា គុយវ៉ែត អេមីរ៉ាត់អារ៉ាប់រួម អេហ្ស៊ីប លីបង់ អាល់ហ្សេរី ហ្ស៊កដានី បារ៉ែន លីប៊ី ទុយនេស៊ី ប៉ាឡេស្ទីន អ៊ីរ៉ាក់ ម៉ូរីតានី ស៊ូដង់ និងអូម៉ង់។

គួរបញ្ជាក់ថា មកទល់នឹងម៉ោងនេះរបាយការណ៍ពី UN បានឱ្យដឹងថា យ៉ាងហោចណាស់មនុស្ស ៥ម៉ឺននាក់បានស្លាប់ និងជាង ៨ម៉ឺននាក់បានរងរបួសដោយសារការរញ្ជួយដីដ៏ខ្លាំងក្លានៅភាគខាងត្បូងប្រទេសតួកគី កាលពីថ្ងៃចន្ទ៕

ប្រែសម្រួល៖ សន្យា

ប្រភព៖ Anadolu

ចុចអាន៖ តារាហូលីវូដ Angelina Jolie ចេញមុខសុំការបរិច្ចាគជួយដល់តួកគី និងស៊ីរី