ណាតូ​ គ្រោងស្នើ​ឲ្យប្រទេស​ជាសមាជិក ពង្រីក​ឃ្លាំង​អាវុធ (មានវីដេអូ)

អង្គការណាតូ ត្រូវបានគេរំពឹងថានឹងស្នើឲ្យរដ្ឋជាសមាជិករបស់ខ្លួន ពង្រីកឃ្លាំងអាវុធរបស់ពួកគេ ដែលកំពុងថមថយយ៉ាងខ្លាំងដោយសារតែការបន្តផ្តល់ជំនួយយោធាដល់ប្រទេសអ៊ុយក្រែន។ នេះបើយោងតាមការលើកឡើងរបស់មន្ត្រីម្នាក់ដែលសុំមិនបញ្ចេញឈ្មោះ ដោយសារតែបញ្ហារសើប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរបាយការណ៍, សូម្បីតែមុនពេលចាប់ផ្តើមប្រតិបត្តិការយោធារបស់រុស្ស៊ីនៅអ៊ុយក្រែនកាលពីខែកុម្ភៈឆ្នាំមុនក៏ដោយ សមាជិកជាច្រើនរបស់អង្គការណាតូ មិនបានឈានដល់គោលដៅស្តុកគ្រាប់ទេ ពីព្រោះក្រុមមន្ត្រីជឿថា សង្គ្រាមបំផ្លិចបំផ្លាញជាមួយការប្រយុទ្ធដោយប្រើប្រាប់កាំភ្លើងធំ គឺប្រហែលលែងកើតឡើងទៀតហើយ។

ស្របពេលជាមួយគ្នានោះ អ្នកការទូតអឺរ៉ុបម្នាក់ បានប្រាប់អ្នកសារព័ត៌មានថា “ប្រសិនបើអឺរ៉ុបចង់ប្រយុទ្ធជាមួយរុស្ស៊ីនោះ ប្រទេសមួយចំនួននឹងអស់គ្រាប់ក្នុងរយៈពេលត្រឹមតែប៉ុន្មានថ្ងៃប៉ុណ្ណោះ”។

ក្នុងន័យនេះ អង្គការណាតូ ទំនងជាបង្កើនកម្រិតគោលដៅ សម្រាប់សមាជិករបស់ខ្លួនទាក់ទងនឹងឃ្លាំងអាវុធ។

របាយការណ៍បន្ថែមថា ការសម្រេចចិត្តលើគោលដៅឃ្លាំងអាវុធ នឹងត្រូវធ្វើឡើងក្នុងកិច្ចប្រជុំកំពូលរបស់អង្គការណាតូ នៅប្រទេសលីទុយអានី ដែលគ្រោងធ្វើនៅថ្ងៃទី១១-១២ខែកក្កដា។

មុននេះ លោក Tobias Ellwood ប្រធានគណកម្មាធិការការពារជាតិសភារបស់ចក្រភពអង់គ្លេស បានប្រាប់ប្រព័ន្ធផ្សព្វផ្សាយថា កងទ័ពចក្រភពអង់គ្លេសកំពុងស្ថិតក្នុងស្ថានភាពធ្ងន់ធ្ងរ ថ្វីបើមានការវិនិយោគទុនរាប់ពាន់លានដុល្លារ អស់រយៈពេលពីរទសវត្សរ៍ក៏ដោយ។

គួរបញ្ជាក់ជាថ្មី បន្ទាប់ពីរុស្ស៊ីចាប់ផ្តើមប្រតិបត្តិការពិសេសរបស់ខ្លួនក្នុងប្រទេសអ៊ុយក្រែន នៅថ្ងៃទី២៤ខែកុម្ភៈឆ្នាំ២០២២មក សហរដ្ឋអាមេរិកនិងសម្ព័ន្ធមិត្ត បានបង្កើនជំនួយយោធារបស់ពួកគេដល់ទីក្រុងកៀវ ដោយផ្គត់ផ្គង់សព្វាវុធមានតម្លៃរាប់ពាន់លានដុល្លារ។ ទីក្រុងមូស្គូបានព្រមានម្តងហើយម្តងទៀតថា ជំនួយបែបនេះនឹងធ្វើឲ្យជម្លោះអ៊ុយក្រែនអូសបន្លាយពេល៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Sputnik

ចុចអាន៖ រុស្ស៊ី ព្រមានថា អាមេរិក និង ណាតូ កំពុងដើរលើផ្លូវឆ្ពោះទៅកាន់ជម្លោះយោធាទ្រង់ទ្រាយធំ នៅអឺរ៉ុប