ព័ត៌មានអន្ដរជាតិ

រុស្ស៊ី បង្អួតអាវុធទំនើបបំផុតប្រមាណ ២០០ ប្រភេទ

បានផុស

២ years មុន

នៅ

ថ្ងៃអង្គារ ១៤ កុម្ភៈ ២០២៣

ដោយ

ប្រទេសរុស្ស៊ីបានដាក់តាំងបង្ហាញអាវុធ និងឧបករណ៍យោធាប្រហែល ២០០ ប្រភេទនៅឯពិព័រណ៍ Aero India ឆ្នាំ ២០២៣ ដែលបានរៀបចំឡើងកាលពីថ្ងៃចន្ទ ទី១៣ ខែកុម្ភៈនេះ ខណៈយោងតាមអ្នករៀបចំបានឲ្យដឹងថា ក្រុមហ៊ុនចំនួន ៨០៧ រួមទាំងក្រុមហ៊ុនបរទេសចំនួន ១០៩ បានចូលរួមក្នុងព្រឹត្តិការណ៍នេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុនលក់សព្វាវុធរដ្ឋរុស្ស៊ី Rosoboronexpoert បាននិយាយថា ក្រុមហ៊ុនបានបង្ហាញអំពីអាវុធទំនើបបំផុត និងគ្រឿងបរិក្ខារយោធាដែលផលិតដោយរុស្សីប្រហែល ២០០ ប្រភេទ រួមទាំងយន្តហោះចម្បាំងពហុមុខងារជំនាន់ទី ៥ Su-57E និងយន្តហោះចម្បាំងធុនស្រាល Checkmate ។

លើសពីនេះ អ្នកទស្សនាការតាំងពិព័រណ៍អាកាស Aero India ឆ្នាំ ២០២៣ នឹងអាចឃើញយន្តហោះដឹកជញ្ជូនយោធាប្រភេទ Il-76MD-90A(E), នាវាចាក់ប្រេងលើអាកាស Il-78MK-90A, យន្តហោះចម្បាំង Su-35 និង Su-30SME, យន្តហោះចម្បាំងជួរមុខពហុតួនាទី MiG-35D ក៏ដូចជាឧទ្ធម្ភាគចក្រប្រយុទ្ធ Ka-52E និង Mi-28NE និងយានដឹកជញ្ជូនយោធា Mi-171Sh ។

ទន្ទឹមនោះ រុស្សីក៏បានបង្ហាញយានគ្មានមនុស្សបើកឈ្លបយកការណ៍ និងវាយប្រហារ Orion-E, យាន Orlan-10E និងយាន Orlan-30 ដែលបានចាប់ផ្តើមផលិតនៅឆ្នាំ ២០២២ ។

ចំណែកនៅក្នុងផ្នែកការពារដែនអាកាសវិញ ក្រុមហ៊ុន Rosoboronexport ក៏បានតាំងបង្ហាញប្រព័ន្ធខែលការពារដែនអាកាសរយៈចម្ងាយឆ្ងាយ S-400 Triumf, ប្រព័ន្ធមីស៊ីលការពារដែនអាកាស S-350E Vityaz, ប្រព័ន្ធមីស៊ីល Viking, ប្រព័ន្ធមីស៊ីល Tor-M2KM និងប្រព័ន្ធបាញ់មីស៊ីលពីដីទៅអាកាស Tor-M2E ។

បន្ថែមពីនេះ ប្រព័ន្ធការពារកាំជ្រួចមីស៊ីល Abakan 98R6E ដែលត្រូវបានរចនាឡើងដើម្បីកម្ទេចមីស៊ីលផ្លោងយុទ្ធសាស្ត្រ និងប្រតិបត្តិការទំនើបៗ ត្រូវបានដាក់តាំងបង្ហាញនៅក្នុងប្រទេសឥណ្ឌាជាលើកដំបូង ខណៈប្រព័ន្ធប្រឆាំងយន្តហោះគ្មានមនុស្សបើកដែលផលិតដោយរុស្ស៊ី រួមមាន Repellent, RLK-MCE, RB-504P-E និង RB-504A-E ក៏បានដាក់បង្ហាញផងដែរ ។

គួរបញ្ជាក់ថា ការតាំងបង្ហាញយន្តហោះប្រចាំឆ្នាំ Aero India លើកទី ១៤ បានចាប់ផ្ដើមដំណើរការនៅទីក្រុង Bangalore កាលពីថ្ងៃទី ១៣ ដល់ថ្ងៃទី ១៧ ខែកុម្ភៈ ខណៈកាលពីឆ្នាំ ២០២១ ប្រទេសរុស្សី ដែលជាអ្នកចូលរួមយ៉ាងសកម្មនៅក្នុងកម្មវិធីនេះ ក៏បានបង្ហាញផលិតផលយោធាជាង ២០០ ប្រភេទផងដែរ ៕