មិនគួរឲ្យជឿ! ក្មេងស្រីតួកគី ជាប់ក្រោមគំនរអគារជាងមួយសប្តាហ៍ ត្រូវសង្គ្រោះបាន

ក្មេងស្រីតូចម្នាក់ ត្រូវបានជួយសង្គ្រោះបន្ទាប់ពីចំណាយពេលជាងមួយសប្តាហ៍ ជាប់នៅក្រោមអាផាមិនដែលបាក់រលំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វីដេអូដ៏គួរឲ្យអាណិត បង្ហាញពីក្រុមអ្នកជួយសង្គ្រោះបានទាញ កុមារីឈ្មោះ Miray អាយុ៦ឆ្នាំ ពីគំនរបាក់បែកនៃផ្ទះរបស់នាង ដែលត្រូវបានបំផ្លាញនៅក្នុងប្រទេសតួកគី។ នាងបានចំណាយពេល ១៧៨ម៉ោងជាប់នៅក្រោមគំនរបាក់បែក។

ពេលនេះ ក្រុមជួយសង្គ្រោះកំពុងធ្វើការទាំងថ្ងៃទាំងយប់គ្មានពេលសម្រាក ដើម្បីព្យាយាមជួយសង្គ្រោះអ្នកផ្សេងទៀត ដែលកំពុងជាប់នៅក្រោមអគារក្នុងទីក្រុង Adiyaman ភាគខាងត្បូងប្រទេសតួកគី។

តាមការឲ្យដឹងពីក្រុមជួយសង្គ្រោះ, ក្តីសង្ឃឹមក្នុងការស្វែងរកអ្នកនៅរស់រានមានជីវិតបន្ថែមទៀតកាន់តែខើចទៅៗហើយ ព្រោះថា មានភាគរយតិចបំផុត ដែលមនុស្សអាចស៊ូទ្រាំរស់បានបន្ទាប់ពីត្រូវជាប់ក្រោមគំនរអគារ លើសពី៥ថ្ងៃ។

គួរបញ្ជាក់ថា គិតត្រឹមរសៀលថ្ងៃអង្គារទី១៤ខែកុម្ភៈ ចំនួនអ្នកស្លាប់ដោយសារគ្រោះរញ្ជួយដីកម្រិត៧.៨រ៉ិចទ័រទាំងនៅក្នុងប្រទេសតួកគី និងស៊ីរី បានកើនឡើងលើស៣៧០០០នាក់ហើយ ហើយមើលទៅតួលេខហាក់ដូចជានឹងបន្តកើនឡើងទៀត។

អង្គការសហប្រជាជាតិបានព្រមានថា ចំនួនមនុស្សស្លាប់អាចកើនឡើងលើស៥៥០០០នាក់ ឯណោះ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ អ្នកនៅរស់ពីការរញ្ជួយដីតួកគី កំពុងប្រឈមនឹងគ្រោះថ្នាក់ដល់ជីវិតមួយទៀត