ព័ត៌មានអន្ដរជាតិ

ប្រទេសអឺរ៉ុប ២ បដិសេដមិនបញ្ជូនរថក្រោះខ្លារខិន Leopard 2 ទៅឲ្យ អ៊ុយក្រែន

បានផុស

២ years មុន

នៅ

ថ្ងៃព្រហស្បតិ៍ ១៦ កុម្ភៈ ២០២៣

ដោយ

កាសែតអាល្លឺម៉ង់ Die Welt បានរាយការណ៍កាលពីពេលថ្មីៗនេះថា ប្រទេសហូឡង់ និងដាណឺម៉ាក នឹងមិនបញ្ជូនរថក្រោះប្រយុទ្ធខ្លារខិន Leopard 2 ផលិតដោយអាល្លឺម៉ង់ ទៅកាន់ប្រទេសអ៊ុយក្រែននោះទេ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយករដ្ឋមន្ត្រីហូឡង់ លោក Mark Rutte បាននិយាយកាលពីខែមុនថា រដ្ឋាភិបាលរបស់លោកកំពុងពិចារណាទិញរថក្រោះ Leopard 2 ចំនួន ១៨ គ្រឿងពីប្រទេសអាល្លឺម៉ង់ ហើយផ្ទេរវាទៅឲ្យអ៊ុយក្រែន ប៉ុន្តែទោះជាយ៉ាងណា ជម្រើសនេះត្រូវបានលុបចោលវិញហើយ ។

ទន្ទឹមនោះ មន្ត្រីហូឡង់បានលើកឡើងទៀតថា ការសម្រេចចិត្តមិនបញ្ជូនរថក្រោះទៅឲ្យរដ្ឋាភិបាលទីក្រុងកៀវ ត្រូវបានធ្វើឡើងក្នុងការសម្របសម្រួលយ៉ាងជិតស្និទ្ធរវាងហូឡង់ និងអាល្លឺម៉ង់ ខណៈកន្លងមក ប្រទេសដាណឺម៉ាក និងហូឡង់បានយល់ព្រមផ្តល់មូលនិធិដល់លើការជួសជុលរថក្រោះខ្លារខិន Leopard 1A5 ដែលជាម៉ូដែលចាស់ជាងម៉ូដែល Leopard 2 ពីស្តុករបស់អាល្លឺម៉ង់ ដើម្បីបរិច្ចាគទៅឲ្យអ៊ុយក្រែន ។

គួរបញ្ជាក់ថា កាលពីថ្ងៃទី២៤ ខែកុម្ភៈ ឆ្នាំ២០២២ លោក វ្ល៉ាឌីមៀរ ពូទីន បានចាប់ផ្តើមប្រតិបត្តិការសឹកមួយនៅអ៊ុយក្រែន ដើម្បីឆ្លើយតបនឹងសំណើសុំជំនួយពីប្រមុខនៃសាធារណរដ្ឋ Donbass ខណៈរហូតមកដល់ពេលនេះ វាអូសបន្លាយពេលជិត ១ ឆ្នាំហើយ ។

បន្ទាប់មក លោកខាងលិចបានដាក់ទណ្ឌកម្មយ៉ាងខ្លាំងក្លាប្រឆាំងរុស្ស៊ី និងបង្កើនការផ្គត់ផ្គង់សព្វាវុធដល់រដ្ឋាភិបាលទីក្រុងកៀវ ដែលមានតម្លៃរាប់សិបពាន់លានដុល្លារ ៕