ប្រមុខ UN ប្រកាសរកមូលនិធិ ១ ពាន់លានដុល្លារជួយដល់ តួកគី

អគ្គលេខាធិការអង្គការសហប្រជាជាតិ (UN) លោក Antonio Guterres ប្រកាសរកប្រាក់ចំនួន ១ ពាន់លានដុល្លារដល់ប្រទេសតួកគី ដែលរងគ្រោះដោយគ្រោះរញ្ជួយដី ក្នុងរយៈពេល ៣ ខែ ហើយបានជំរុញសហគមន៍អន្តរជាតិឲ្យជួយបង្គ្រប់មូលនិធិជំនួយមួយនេះ ។

លោក Guterres បាននិយាយកាលពីថ្ងៃព្រហស្បតិ៍ថា មូលនិធិនេះនឹងជួយមនុស្សចំនួន ៥.២ លាននាក់ និងជំរុញការគាំទ្រសម្រាប់កិច្ចខិតខំប្រឹងប្រែងសង្គ្រោះ ក្នុងវិស័យមួយចំនួន រួមទាំងសន្តិសុខស្បៀង ការការពារ ការអប់រំ ទឹក និងទីជម្រកជាដើម ។

ប្រមុខ UN រូបនេះលើកឡើងថា តួកគីគឺជាប្រទេសដែលមានចំនួនជនភៀសខ្លួនច្រើនជាងគេនៅលើពិភពលោក ហើយប្រទេសនេះបានបង្ហាញពីចិត្តសប្បុរសដ៏ធំធេង ចំពោះប្រទេសជិតខាងស៊ីរីអស់រយៈពេលជាច្រើនឆ្នាំមកហើយ ។

លោក​ Guterres បញ្ជាក់ទៀតថា ដូច្នេះ​ពេល​នេះ​ គែជា​ពេល​សម្រាប់​ពិភពលោក​ក្នុង​ការ​គាំទ្រ​ដល់ប្រជាជន​តួកគីវិញហើយ ជាពិសេសគឺការផ្ដល់ជំនួយគ្រប់បែបយ៉ាងទាំងអស់ ។

គួរបញ្ជាក់ថា  កាលពីពេលថ្មីៗនេះ អង្គការសហប្រជាជាតិ (UN) ក៏បានចាប់ផ្តើមការរៃអង្គាសជាទឹកប្រាក់ចំនួន ៣៩៧ លានដុល្លារផងដែរក្នុងរយៈពេល ៣ ខែ ដើម្បីជួយអ្នករួចរស់ជីវិតពីការរញ្ជួយដីនៅក្នុងប្រទេសស៊ីរី ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ មកដឹងចំនួនអគារលំនៅដ្ឋានដែល តួកគី ត្រូវសាងសង់ឡើងវិញក្នុងតំបន់ រញ្ជួយដី