ជប៉ុន បរាជ័យបាញ់បង្ហោះរ៉ុកកែត H3 ដែលខំផលិតជាង ៣០ ឆ្នាំ

គ្រាប់រ៉ុកកែត H3 ដែលជប៉ុនប្រើពេលជាង ៣០ ឆ្នាំដើម្បីផលិតឡើងបានបរាជ័យក្នុងការបាញ់បង្ហោះនៅឯមជ្ឈមណ្ឌល​អវកាស Tanegashima នៅថ្ងៃសុក្រនេះ ។

អំឡុងពេលដំណើរការបាញ់ ម៉ាស៊ីនដែលនៅសងខាងគ្រាប់រ៉ុកកែត គឺមិនដំណើរការឡើយ បន្ទាប់មកម៉ាស៊ីនមេរបស់វាត្រូវបានកាត់ផ្តាច់ នៅពេលរាប់ថយក្រោយត្រៀមបាញ់ ។

ទាក់ទងជាមួយបញ្ហានេះដែរ ទីភ្នាក់ងាររុករកអវកាសប្រទេសជប៉ុន ក៏កំពុងព្យាយាមស្វែងរកមូលហេតុចំពោះគ្រាប់រ៉ុកកែតដែលមិនអាចហោះហើរបាននេះ ។

គ្រាប់រ៉ុក្កែត H3 ដែលក្រុមហ៊ុន JAXA និង Mitsubishi Heavy Industries ចំណាយពេល ៣ ទសវត្សក្នុងការផលិតនោះ ប្រើថវិកាអស់ប្រហែល ១.៥២ ពាន់លានដុល្លារ ។

ដំបូងឡើយគ្រាប់រ៉ុកកែតនេះ គ្រោងដាក់ឲ្យដំណើរការនៅឆ្នាំ ២០២០ ប៉ុន្តែដោយសារតែពេលវេលា រួមជាមួយការអភិវឌ្ឍប្រព័ន្ធម៉ាស៊ីនបន្ថែម មិនទាន់អំណោយផល ទើបលើកមកបាញ់នៅក្នុងឆ្នាំ ២០២៣ នេះវិញ ។ ​

រ៉ុក្កែត H3 គឺត្រូវដឹកបញ្ជូនផ្កាយរណបអង្កេតផែនដីថ្មីឈ្មោះ DAICHI-3 ដែលត្រូវបានគេរំពឹងថា នឹងប្រើប្រាស់សម្រាប់ការគ្រប់គ្រងគ្រោះមហន្តរាយ ៕

ប្រែសម្រួលដោយ ៖ នាង រតនៈ

ប្រភព ៖ NHK

ចុចអាន ៖ កូរ៉េខាងជើង គំរាមធ្វើសកម្មភាពយោធាតបត បើ កូរ៉េខាងត្បូង និងអាមេរិក ចាប់ផ្តើមសមយុទ្ធ