ចិន ត្រៀមបង្ហាញផែនការ ដោះស្រាយជម្លោះ រុស្ស៊ី-អ៊ុយក្រែន

អ្នកការទូតកំពូលចិនលោក Wang Yi បានប្រាប់សន្និសីទសន្តិសុខទីក្រុង Munich កាលពីថ្ងៃសៅរ៍ទី១៨ខែកុម្ភៈថា ប្រទេសចិន នឹងបង្ហាញផែនការមួយ ក្នុងគោលបំណងដោះស្រាយជម្លោះអ៊ុយក្រែនដោយសន្តិវិធី។ លោកក៏បានព្រមានដែរថា អ្នក​ដែល​អំពាវនាវ​ឲ្យ​បន្ត​ការ​ប្រយុទ្ធ​គ្នាគឺមិន​ខ្វល់​ពី​ជីវិត និង​ការ​ស្លាប់​របស់​ពលរដ្ឋ​អ៊ុយក្រែន​ឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយ​មិន​បញ្ជាក់​ពេលវេលា​សម្រាប់​សំណើ​នេះ លោក Wang បាន​ថ្លែងថា “​យើង​នឹង​បង្ហាញ​ជំហរ​របស់​ចិន​លើ​ការ​ដោះស្រាយ​ផ្នែកនយោបាយ​នៃ​វិបត្តិ​អ៊ុយក្រែន​។ យើង​នឹង​ឈរ​យ៉ាង​រឹងមាំ​លើ​ផ្នែក​សន្តិភាព និង​កិច្ច​សន្ទនា”។

ទោះបីជាយ៉ាងណាក៏ដោយ លោក Wang មិនបានរៀបរាប់លម្អិតអំពីផែនការនេះទេ ប៉ុន្តែនិយាយថា “បូរណភាពទឹកដី និងអធិបតេយ្យភាព” នៃអ្នកដែលពាក់ព័ន្ធ គួរតែត្រូវបានគោរព ក៏ដូចជាការព្រួយបារម្ភផ្នែកសន្តិសុខស្របច្បាប់របស់ប្រទេសដែលកើតសង្រ្គាមជាមួយប្រទេសមួយផ្សេងទៀតផងដែរ។

លោកបន្ថែមថា ប្រទេសចិនមានជំហរក្នុងការក្លាយខ្លួនជាអ្នកសម្របសម្រួលសន្តិភាព ដោយសារខ្លួនមិនមែនជាភាគីពាក់ព័ន្ធដោយផ្ទាល់ ប៉ុន្តែចិនមិនមែននៅស្ងៀមឡើយ ចាប់តាំងពីប្រតិបត្តិការយោធារបស់រុស្ស៊ីនៅអ៊ុយក្រែន ផ្ទុះឡើងកាលពីជិតមួយឆ្នាំមុន។

គួរបញ្ជាក់ថា ប្រទេសចិនបានបដិសេធចូលរួមក្នុងយុទ្ធនាការដាក់ទណ្ឌកម្មដែលដឹកនាំដោយលោកខាងលិចប្រឆាំងរុស្ស៊ី ហើយបានធ្វើឲ្យទំនាក់ទំនងសេដ្ឋកិច្ចរបស់ខ្លួនកាន់តែស៊ីជម្រៅជាមួយទីក្រុងមូស្គូក្នុងរយៈពេលមួយឆ្នាំចុងក្រោយនេះ៕

ប្រែសម្រួល៖ Vann Vann

ប្រភព៖ RT

ចុចអាន៖ មេទ័ពអាមេរិក ព្រមានថា ជម្លោះរុស្ស៊ី-អ៊ុយក្រែន នឹងគ្មានកងទ័ពខាងណាឈ្នះឡើយ