ព័ត៌មានអន្ដរជាតិ

ថៃ រកឃើញប្រហិតផ្ទុកសារធាតុគីមីហាមឃាត់ ដែលចែកចាយលក់ក្នុងទីផ្សារជាង៤០រួចទៅហើយ

បានផុស

២ years មុន

នៅ

ថ្ងៃអាទិត្យ ១៩ កុម្ភៈ ២០២៣

ដោយ

សាលាអន្តរជាតិមួយក្នុងខេត្ត Pathum Thani ប្រទេសថៃ ត្រូវបានគេព្រមានមិនឲ្យយកប្រហិតដែលខ្លួនទើបតែទិញ ទៅធ្វើអាហារថ្ងៃត្រង់សម្រាប់សិស្ស បន្ទាប់ពីមានការវាយឆ្មក់លើរោងចក្រផលិតប្រហិតម៉ាក “Peekaboo”។ នេះបើតាមការបញ្ជាក់ពី មន្ត្រីនៃរដ្ឋបាលចំណីអាហារ និងឱសថ (FDA) កាលពីថ្ងៃសៅរ៍ទី១៨ខែកុម្ភៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីនិយាយថា ការធ្វើតេស្តដំបូងបានរកឃើញថា ប្រហិត Peekaboo មានផ្ទុកសារធាតុ Borax (បូរ៉ាក់) ដែលត្រូវបានហាមឃាត់។

រោងចក្រនេះបានដំណើរការប្រហែល២ឆ្នាំមកហើយ ដោយអាចផលិតប្រហិតបានរហូតដល់៨០០គីឡូក្រាមក្នុងមួយថ្ងៃ មុនការវាយឆ្មក់កាលពីថ្ងៃព្រហស្បតិ៍ទី១៦ខែកុម្ភៈ។

រោងចក្រនេះ បានចែកចាយប្រហិត Peekaboo លក់នៅផ្សារសើមជាង៤០ ក្នុងទីក្រុងបាងកក ខេត្ត Pathum Thani, Nonthaburi និង Samut Prakan។

មន្ត្រី FDA និងប៉ូលិសបានធ្វើសកម្មភាពបន្ទាប់ពីទទួលព័ត៌មានថា រោងចក្រដែលមានទីតាំងនៅស្រុក Khong Luang មួយនេះ មិនគោរពតាមបទប្បញ្ញត្តិផលិតកម្មសុវត្ថិភាពចំណីអាហារ។

រោងចក្រក៏បានប្រើប្រាស់សារធាតុរក្សាទុកអាហារច្រើនហួសហេតុ និងមិនបានធ្វើការត្រួតពិនិត្យគុណភាពផងដែរ។

ក្រុមមន្ត្រីរឹបអូសបានសាច់ប្រហិតជាង៣០បាវ សាច់ជ្រូកនិងសាច់មាន់១៣គីឡូក្រាម កញ្ចប់សារធាតុគីមីសម្រាប់ការធ្វើឲ្យចំណីអាហារទុកបានយូរ និងម៉ាស៊ីនធ្វើប្រហិតចំនួន៣ដែលមានសាច់ប្រហិតនៅក្នុងនោះ៕