អតីតវេជ្ជបណ្ឌិតសេតវិមាន ថា គ្រូពេទ្យបានលាក់បាំង អំពីសុខភាពរបស់លោក Biden (មានវីដេអូ)

អតីតវេជ្ជបណ្ឌិតសេតវិមាន បានរិះគន់របាយការណ៍សុខភាពចុងក្រោយរបស់ប្រធានាធិបតីសហរដ្ឋអាមេរិកលោក Joe Biden ហើយបានស្នើសុំឲ្យឈប់បិទបាំងទៀតទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តំណាងរាស្រ្តអាមេរិកលោក Ronny Jackson ដែលបម្រើការក្នុងសម័យកាលលោក Trump និងលោក Obama បានហៅរបាយការណ៍សុខភាពថ្មីៗរបស់លោក Biden ថា “គួរឲ្យព្រួយបារម្ភ” ហើយចោទប្រកាន់ថា របាយការណ៍នោះថា មិនលើកឡើងអំពីការធ្លាក់ចុះសុខភាពផ្លូវចិត្តរបស់ប្រធានាធិបតីអាមេរិក។

ប្រធានាធិបតីវ័យ៨០ឆ្នាំ ត្រូវបានវេជ្ជបណ្ឌិតរបស់គាត់ប្រកាសកាលពីដើមសប្តាហ៍មុនថា មានសុខភាពល្អមាំមួនអាចបំពេញកាតព្វកិច្ចដោយគ្មានបញ្ហា។ នោះគឺជាការពិនិត្យសុខភាពប្រចាំឆ្នាំចុងក្រោយបំផុត មុនពេលគាត់ត្រូវបានគេរំពឹងថា នឹងប្រកាសឈរឈ្មោះសម្រាប់ការបោះឆ្នោតជាថ្មីនៅឆ្នាំ២០២៤។

វេជ្ជបណ្ឌិតរបស់លោក Biden គឺលោក Kevin O’Connor បាននិយាយនៅក្នុងលិខិតមួយដែលចេញផ្សាយដោយសេតវិមានថា “លោកប្រធានាធិបតី Biden នៅតែមានសុខភាពល្អ និងរឹងមាំ ក្នុងអាយុ៨០ឆ្នាំ ដែលស័ក្តិសមនឹងអនុវត្តភារកិច្ចរបស់ប្រធានាធិបតីដោយជោគជ័យ រួមទាំងក្នុង​ឋានៈ​ជា​នាយក​ប្រតិបត្តិ ប្រមុខ​រដ្ឋ និង​ជា​អគ្គ​មេ​បញ្ជាការ”។

ទោះបីជាយ៉ាងណាក៏ដោយ លោក Jackson បានប្រាប់ Fox News ថា របាយការណ៍នេះមិនមានអ្វីក្រៅពីការបិទបាំងនោះទេ។ លោកនិយាយថា “ប្រជាជនអាមេរិកភាគច្រើនអាចមើលឃើញហើយថា សុខភាពផ្លូវចិត្តរបស់លោក Biden គឺចុះខ្សោយទាំងស្រុង។ មិនមានតម្លាភាពឡើយពីសេតវិមាន ចំពោះអ្វីដែលកំពុងកើតឡើង”។

លោក Jackson បន្តថា ជាក់ស្តែង របាយការណ៍ពិនិត្យរាងកាយជាលាយលក្ខណ៍អក្សរដែលចេញផ្សាយដោយគ្រូពេទ្យរបស់លោក Biden បញ្ជាក់ថា រដ្ឋបាលនេះនៅតែប្រកាន់ខ្ជាប់ចំពោះ ការលាក់បាំងការពិត។ របាយការណ៍​នោះ ​មិន​បាន​លើក​ឡើង​អំពី​សុខភាព​ផ្លូវចិត្ត​កាន់តែ​យ៉ាប់យ៉ឺនរបស់​លោក Biden ទេ។

លោក Jackson អះអាងថា “ជារឿងគួរឲ្យព្រួយបារម្ភ! ខ្ញុំបានផ្ញើលិខិតចំនួនបីទៅសេតវិមានរួចហើយ ដែលទាមទារឲ្យលោក Biden ទទួលបានការធ្វើតេស្តខាងបញ្ញា ហើយត្រូវផ្សាយលទ្ធផលជាសាធារណៈ ប៉ុន្តែសំណើត្រូវបានបដិសេធ។ ដូចនេះអ្នកទាំងអស់គ្នាអាចយល់ឃើញហើយថា បែបមានរឿងអ្វីមិនស្រួលហើយ”៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ គ្រូពេទ្យសេតវិមាន បញ្ចេញលទ្ធផល ពិនិត្យសុខភាពលោក ចូ បៃដិន