ទៅអ៊ុយក្រែនម្សិលមិញ លោក Biden ប្រកាសផ្តល់ជំនួយបន្ថែម ៥០០លានដុល្លារឲ្យ ទីក្រុង កៀវ (មានវីដេអូ)

ប្រធានាធិបតីសហរដ្ឋអាមេរិក លោក Joe Biden បានធ្វើដំណើរដោយមិនប្រកាសជាមុន ទៅកាន់ទីក្រុង កៀវ ពោលគឺប៉ុន្មានថ្ងៃ មុនខួបលើកទីមួយនៃការវាយលុករបស់រុស្ស៊ីលើអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដំណើរ​ទស្សនកិច្ច​របស់​លោក Biden កាលពី​ថ្ងៃ​ចន្ទទី២០ខែកុម្ភៈ គឺជា​ដំណើរ​ទៅកាន់​ប្រទេស​អ៊ុយក្រែន​លើក​ដំបូង ​ចាប់​តាំង​ពី​ប្រធានាធិបតី​រុស្ស៊ី លោក Vladimir Putin ​បញ្ជា​ឲ្យ​កងទ័ព​របស់​លោក​ ចូលលុកលុយ​ប្រទេស​ជិតខាង​នៅ​ថ្ងៃ​ទី២៤ខែ​កុម្ភៈឆ្នាំ២០២២។

សំឡេងស៊ីរ៉ែនព្រមានការវាយប្រហារតាមអាកាស បានបន្លឺឡើងខណៈលោក Biden ជួបប្រធានាធិបតីអ៊ុយក្រែន Volodymyr Zelensky នៅក្នុងរដ្ឋធានីរបស់ប្រទេសអ៊ុយក្រែន ប៉ុន្តែមិនមានការវាយប្រហារអ្វីទេ។

យោងតាមសេចក្តីថ្លែងការណ៍របស់សេតវិមាន, ដំណើរទស្សនកិច្ចនេះគឺដើម្បីបញ្ជាក់ជាថ្មី នូវការប្តេជ្ញាចិត្តដោយមិនងាករេ និងឥតឈប់ឈររបស់អាមេរិក ចំពោះលទ្ធិប្រជាធិបតេយ្យ អធិបតេយ្យ និងបូរណភាពទឹកដីរបស់អ៊ុយក្រែន។

សេចក្តីថ្លែងការណ៍នេះ ​បាន​ដក​ស្រង់​សម្តី​របស់​លោក Biden ដែលនិយាយថា “នៅពេលលោក ពូទីន ចាប់ផ្តើមការវាយលុករបស់គាត់កាលពីជិតមួយឆ្នាំមុន គាត់គិតថា អ៊ុយក្រែនទន់ខ្សោយ ហើយប្រទេសលោកខាងលិចបែកបាក់គ្នា។ គាត់គិតថា គាត់អាចលើសយើង ប៉ុន្តែ​គាត់គិតខុសទាំងស្រុង”។

សេចក្តីថ្លែងការណ៍បានបន្ថែមថា “នៅចុងសប្តាហ៍នេះ យើងនឹងប្រកាសពីការដាក់ទណ្ឌកម្មបន្ថែមប្រឆាំងនឹងឥស្សរជន និងក្រុមហ៊ុនដែលព្យាយាមគេច ឬជួយជ្រោមជ្រែងសង្រ្គាមរបស់រុស្ស៊ី”។

លោក Biden និយាយថា សហរដ្ឋអាមេរិកនឹងផ្តល់ឲ្យអ៊ុយក្រែន នូវជំនួយបន្ថែមក្នុងទំហំទឹកប្រាក់៥០០លានដុល្លារ ដែលនឹងរួមបញ្ចូលគ្រាប់កាំភ្លើងធំ ប្រព័ន្ធប្រឆាំងគ្រឿងសឹក និងរ៉ាដាឃ្លាំមើលអាកាសផងដែរ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖​ Aljazeera

ចុចអាន៖ ប្រភពមួយ ទម្លាយស្ថានភាព និងរយៈពេលដែលលោក Zelensky លាក់ខ្លួនពួនអាត្មាក្នុងលេណដ្ឋាន កាលជម្លោះផ្ទុះឡើងដំបូង