ក្រោយបានរថក្រោះ Leopard 2 ហើយ លោក Zelensky ត្រៀមបញ្ជូនបញ្ជី​ឈ្មោះអាវុធបន្ថែមទៅ អាមេរិក

បើយោងតាមសារព័ត៌មានអាមេរិកមួយបានរាយការណ៍ថា ប្រធានាធិបតីអ៊ុយក្រែនលោក Volodymyr Zelensky គ្រោងនឹងបញ្ជូនបញ្ជីឈ្មោះសព្វាវុធ ដែលទីក្រុងកៀវត្រូវការទៅកាន់សហរដ្ឋអាមេរិក ដោយក្នុងនោះក៏អាចរាប់បញ្ចូលទាំងយន្តហោះចម្បាំង F-16 ផងដែរ ។

ក្នុងជំនួបជាមួយប្រធានកិច្ចការបរទេសនៃសភាអាមេរិកលោក Michael McCaul ក្នុងទីក្រុងកៀវ កាលពីដើមសប្តាហ៍នេះ, លោក Zelensky បាននិយាយថា “លោកនឹងផ្ដល់បញ្ជីឈ្មោះអាវុធដែលអ៊ុយក្រែនត្រូវការ ទៅកាន់គណៈប្រតិភូអាមេរិក ដើម្បីបង្កើនល្បឿនជួយឲ្យអ៊ុយក្រែនឈ្នះសង្គ្រាម ហើយក្នុងនោះក៏មានយន្តហោះ F-16 ផងដែរ” ។

ពាក់ព័ន្ធនឹងបញ្ហានេះដែរ រដ្ឋាភិបាលទីក្រុងកៀវ​បាន​ស្នើ​ដល់អាមេរិក និង​សម្ព័ន្ធមិត្ត​អង្គការណាតូ​ជាយូរមកហើយ សម្រាប់​យន្តហោះ​ចម្បាំង F-16 ដើម្បី​ប្រើប្រយុទ្ធ​ប្រឆាំង​នឹង​រុស្ស៊ី ។

ទន្ទឹមនោះ ប្រព័ន្ធផ្សព្វផ្សាយរបស់សហរដ្ឋអាមេរិកបានរាយការណ៍កាលពីខែមករាថា មន្ត្រីយោធាអាមេរិកមួយក្រុមកំពុងធ្វើការយ៉ាងស្ងៀមស្ងាត់ដើម្បីបញ្ជូនយន្តហោះ F-16 ទៅកាន់ទីក្រុងកៀវ ហើយកំពុងប្រមូលផ្តុំសន្ទុះ និងកម្លាំងនៅក្នុងក្រសួងការពារជាតិអាមេរិក ចំពេលមានការរៀបចំវាយលុករបស់អ៊ុយក្រែន ដែលតាមគ្រោងទុក គឺនឹងធ្វើឡើងនៅអំឡុងខែមេសា និងឧសភានេះ ។

គួរបញ្ជាក់ថា កាលពីពេលថ្មីៗនេះ អ៊ុយក្រែនក៏ទើបតែទទួលបានរថក្រោះប្រយុទ្ធខ្លារខិន Leopard 2 កញ្ចប់ដំបូងចំនួន ៤ គ្រឿងផងដែរពីសំណាក់ប្រទេសប៉ូឡូញ ពោលនៅចំថ្ងៃខួបគម្រប់ ១ ឆ្នាំនៃប្រតិបតិការសឹករបស់រុស្ស៊ីលើទីក្រុងកៀវ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ទីបំផុត រថក្រោះខ្លារខិន Leopard 2 ទៅដល់ដៃ អ៊ុយក្រែន ហើយ