ព័ត៌មានអន្ដរជាតិ

អ៊ុយក្រែន ថា ១០០ ឆ្នាំទៀត ការផ្សះផ្សាជាមួយ រុស្ស៊ី ក៏មិនអាចទៅរួចដែរ

បានផុស

២ years មុន

នៅ

ថ្ងៃចន្ទ ២៧ កុម្ភៈ ២០២៣

ដោយ

នាយករដ្ឋមន្ត្រីអ៊ុយក្រែនលោក Denys Shmyhal បាននិយាយកាលពីថ្ងៃអាទិត្យថា ការផ្សះផ្សារវាងទីក្រុងមូស្គូ និងទីក្រុងកៀវ គឺមិនអាចធ្វើទៅរួចនោះទេ ទោះបីជា ១០០ ឆ្នាំទៀតក៏ដោយ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Denys Shmyhal បាននិយាយនៅក្នុងបទសម្ភាសន៍ជាមួយកាសែតអាល្លឺម៉ង់ Focus ថា “ការផ្សះផ្សា ក៏ដូចជាកិច្ចសហប្រតិបត្តិការណាមួយរបស់រុស្ស៊ីជាមួយអ៊ុយក្រែន គឺមិនអាចកើតក្នុងរយៈពេល ១០០ ឆ្នាំខាងមុខទេ ។ រុស្ស៊ីត្រូវតែជាអ្នកផ្លាស់ប្ដូរមុន ហើយត្រូវប្រាកដជាប្រទេសប្រជាធិបតេយ្យ គ្មានយោធា និងរំសាយអាវុធនុយក្លេអ៊ែរជាដើម” ។

ទន្ទឹមនោះ លោក Shmyhal ក៏បាននិយាយផងដែរថា ការបង្កកជម្លោះរវាងទីក្រុងមូស្គូ និងទីក្រុងកៀវ ដើម្បីបញ្ឈប់ការបង្ហូរឈាមបន្ថែមទៀត គឺមិនអាចទទួលយកបាននៅលើផ្នែកនៃអ៊ុយក្រែន ព្រោះវានឹងចូលទៅក្នុងដៃរបស់រុស្ស៊ី ហើយនាំទៅរកសង្រ្គាមដ៏ធំមួយទៀត ។

បន្ថែមពីនេះ លោក Shmyhal ក៏បានបដិសេធបន្ថែមទៀតអំពីលទ្ធភាពដែលអ៊ុយក្រែនប្រគល់ទឹកដីណាមួយរបស់ខ្លួនទៅឲ្យរុស្ស៊ី ដោយលោកលើកឡើងថា “សង្គមរបស់យើងនឹងមិនអនុញ្ញាតឲ្យមានរឿងនេះដាច់ខាត ។ មនុស្សល្អបំផុតរបស់យើងរាប់ពាន់នាក់បានស្លាប់ ហើយយើងមិនអាចស្វែងរកការសម្រុះសម្រួលណាមួយជាមួយភេរវករកំពុងលុកលុយ និងធ្វើបាបពិភពលោកទាំងមូលនោះទេ” ។

ជាចុងក្រោយលោកនាយករដ្ឋមន្ត្រីរូបនេះរំឭកថា “ការសម្របសម្រួលដ៏ល្អតែមួយគត់ គឺការដកទ័ពរុស្ស៊ីទាំងស្រុងចេញពីអ៊ុយក្រែនក្នុងព្រំដែនឆ្នាំ ១៩៩១ ។ រុស្ស៊ីត្រូវតែបញ្ឈប់ការបាញ់ប្រហារ បញ្ឈប់ការលុកលុយ និងចាកចេញពីទឹកដីរបស់យើង ហើយខ្ញុំជឿថា ការផ្លាស់ប្តូរ ក៏ដូចជាការសម្រុះសម្រួលព្រំដែនបែបនេះ ក៏មិនអាចទទួលយកបានសម្រាប់អឺរ៉ុបផងដែរ” ៕