អ៊ុយក្រែន កំពុងតាមដានជំនួបរវាង ចិន ជាមួយសម្ព័ន្ធមិត្ត រុស្ស៊ី

ប្រធានាធិបតីបេឡារុសលោក Alexander Lukashenko កំពុងបំពេញទស្សនកិច្ចក្នុងប្រទេសចិននៅថ្ងៃអង្គារនេះ ដើម្បីពិភាក្សាជាមួយលោកប្រធានាធិបតី Xi Jinping ខណៈរដ្ឋាភិបាលលអ៊ុយក្រែន ក៏កំពុងផ្ដោតសំខាន់ និងតាមដានសម្រាប់ជំនួបនេះផងដែរ ។

ទន្ទឹមនោះ កិច្ចប្រជុំនេះក៏ធ្វើឡើង ចំពេលមានសម្ពាធពីសហរដ្ឋអាមេរិកលើប្រទេសចិន ដើម្បីបញ្ចៀសការផ្តល់ជំនួយយោធាដល់រុស្ស៊ីក្នុងប្រតិបត្តិការសឹកនៅអ៊ុយក្រែន ។

ស្របពេលជាមួយគ្នានេះ ដំណើរ​ទស្សនកិច្ច​របស់​មេដឹកនាំដែលជាសម្ព័ន្ធមិត្តរបស់លោក Vladimir Putin ទៅកាន់ប្រទេសចិន ក៏ជាលើកដំបូងរបស់លោកផងដែរ ចាប់តាំងពីផ្ទុះប្រតិបត្តិការសឹករបស់រុស្ស៊ីលើអ៊ុយក្រែនកាលពីមួយឆ្នាំមុន ។

បន្ថែមពីនេះ មេដឹកនាំទាំងពីរត្រូវបានគេរំពឹងថា នឹងពិភាក្សាអំពីរបៀបពង្រឹងទំនាក់ទំនងសេដ្ឋកិច្ចទ្វេភាគី ខណៈមន្ត្រីអាមេរិកវិញជឿជាក់ថា បេឡារុស-ចិន ក៏អាចនិយាយអំពីការគាំទ្រដែលអាចធ្វើទៅបានសម្រាប់រុស្ស៊ី ជាពិសេសគឺការពិចារណារបស់ចិន ក្នុងការបញ្ជូនយន្តហោះដ្រូន និងគ្រាប់រំសេវទៅឲ្យរុស្ស៊ី ។

គួរបញ្ជាក់ថា ប្រធានាធិបតីចិនលោក Xi Jinping បានអញ្ជើញប្រធានាធិបតីបេឡារុស Alexander Lukashenko សម្រាប់ដំណើរទស្សនកិច្ចរយៈពេល ៣ ថ្ងៃដែលចាប់ផ្តើមនៅថ្ងៃអង្គារនេះ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ទីបំផុត រថក្រោះខ្លារខិន Leopard 2 ទៅដល់ដៃ អ៊ុយក្រែន ហើយ