កម្ពុជា និងប្រទេសចំនួន ២៩ទៀត ចូលរួមសមយុទ្ធ “ពស់វែកមាស”​ នៅថៃ (មានវីដេអូ)

កងទ័ពជាង ៧០០០នាក់ មកពីប្រទេសចំនួន៣០ កំពុងចូលរួមក្នុងសមយុទ្ធ ពស់វែកមាសឆ្នាំ២០២៣ ដឹកនាំដោយប្រទេសថៃ និងសហរដ្ឋអាមេរិក ដែលបានចាប់ផ្តើមកាលពីថ្ងៃអង្គារទី២៨ខែកុម្ភៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីបើកសមយុទ្ធនេះ ត្រូវបានធ្វើឡើងរួមគ្នាក្រោមអធិបតីភាព អគ្គមេបញ្ជាការនៃកងកម្លាំងការពារជាតិថៃនាយឧត្តមសេនីយ៍ Chalermpol Srisawat, ឯកអគ្គរដ្ឋទូតសហរដ្ឋអាមេរិក លោក Robert F Godec និងប្រមុខទីបញ្ជាការដ្ឋានឥណ្ឌូប៉ាស៊ីហ្វិករបស់សហរដ្ឋអាមេរិក ឧត្តមនាវីឯក John C Aquilino។

នេះជាឆ្នាំដំបូងហើយ ដែលសមយុទ្ធ “ពស់វែកមាស” រួមបញ្ចូលការបណ្តុះបណ្តាលសម្រាប់គ្រោះមហន្តរាយអវកាស។

ប្រទេស​ចំនួន​ប្រាំពីរ​ដែល​ចូល​រួម​ក្នុង​សម​យុទ្ធ​សង្គ្រាម​ធំ​គឺមាន​ថៃ សហរដ្ឋអាមេរិក សិង្ហបុរី ជប៉ុន ឥណ្ឌូណេស៊ី កូរ៉េខាងត្បូង និង​ម៉ាឡេស៊ី។

ចណែកប្រទេស​ចិន ឥណ្ឌា និង​អូស្ត្រាលី​កំពុង​ចូលរួម​ក្នុង​សមយុទ្ធ​ជំនួយ​មនុស្សធម៌ ខណៈ​ប្រទេស​សង្កេតការណ៍​ទាំង​១០​មាន​កម្ពុជា ឡាវ ប្រេស៊ីល ប៉ាគីស្ថាន វៀតណាម អាល្លឺម៉ង់ ស៊ុយអែត ក្រិក គុយវ៉ែត និង​ស្រីលង្កា។

គួរបញ្ជាក់ថា ពស់វែកមាស គឺជាសមយុទ្ធយោធារួមគ្នាដ៏ធំបំផុតនៅអាស៊ីអាគ្នេយ៍ ដែលរៀបចំក្នុងប្រទេសថៃជារៀងរាល់ឆ្នាំ ដោយកងកម្លាំងប្រដាប់អាវុធថៃ និងទីបញ្ជាការដ្ឋានឥណ្ឌូប៉ាស៊ីហ្វិកសហរដ្ឋអាមេរិក។

កម្មវិធីនេះមានគោលបំណងលើកកម្ពស់ទំនាក់ទំនងយោធាក្នុងចំណោមប្រទេសដែលចូលរួម និងបង្កើនប្រសិទ្ធភាពក្នុងការឆ្លើយតបទៅនឹងការគំរាមកំហែងលើគ្រប់ទិដ្ឋភាពរួមមាន ដីគោក សមុទ្រ ផ្លូវអាកាស អ៊ីនធឺណិត និងលំហអវកាស៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Nation

ចុចអាន៖ អាមេរិក បញ្ជាក់ពេលវេលាធ្វើសមយុទ្ធយោធា “ពស់វែកមាស” ជាមួយ ថៃ