អាមេរិក បើកបញ្ជីខ្មៅពាណិជ្ជកម្មកត់ឈ្មោះក្រុមហ៊ុន ចិន ចូលបន្ថែមចំនួន ២ ទៀត

ប្រធានាធិបតីអាមេរិកលោក ចូ បៃដិន បានដាក់អង្គភាពដ៏លេចធ្លោចំនួន ២ របស់ចិនគឺក្រុមហ៊ុន BGI និងក្រុមហ៊ុន Chinese Cloud Computing Inspur ចូលក្នុងបញ្ជីខ្មៅពាណិជ្ជកម្មអាមេរិក ខណៈភាពតានតឹងជាមួយក្រុងប៉េកាំងនៅតែមានភាពក្តៅគកុក ។

មូលហេតុនៃការដាក់ចូលក្នុងបញ្ជីខ្មៅនេះ ដោយសារតែអាមេរិកបាន​ចោទប្រកាន់ក្រុមហ៊ុន BGI ដែលជាក្រុមហ៊ុនវិភាគហ្សែនដ៏ធំរបស់ចិន​ ថាបានបង្កហានិភ័យដោយចូលរួមចំណែកជួយរដ្ឋាភិបាលចិន ដើម្បីគាបសង្កត់ជនជាតិភាគតិច ។​ ដោយឡែក ចំពោះក្រុមហ៊ុន Chinese Cloud Computing Inspur វិញត្រូវបានចោទប្រកាន់ពីបទប៉ុនប៉ង​ទិញទំនិញអាមេរិក​ក្នុងការគាំទ្រ​ដល់ទំនើបកម្មយោធាចិន ។

ទន្ទឹមនោះ កាលពីឆ្នាំ ២០២០ អាមេរិកក៏ធ្លាប់បានដាក់អង្គភាពចំនួន ២ របស់ក្រុមហ៊ុន GBI Group ចូលក្នុងបញ្ជីខ្មៅម្តងហើយផងដែរ ជុំវិញការចោទប្រកាន់លើការវិភាគហ្សែនដែលប្រើដើម្បីបន្តការគាបសង្កត់ជនជាតិភាគតិច Uyghurs នៅចិន ដោយនៅពេលនោះ ចិនបដិសេធជាដាច់ខាតថា មិនបានធ្វើខុសឡើយ ។​

គួរបញ្ជាក់ថា រហូតមកដល់ពេលនេះ ក្រុមហ៊ុនចិនចំនួន ២៦ ហើយត្រូវបានអាមេរិកដាក់ចូលក្នុងបញ្ជីខ្មៅ ហើយស្របជាមួយស្ថានភាពបច្ចុប្បន្ន ការដាក់ក្រុមហ៊ុនចិនចូលក្នុងបញ្ជីខ្មៅបន្ថែម ហាក់បីដូចជារុញកម្ដៅបញ្ហានៃប្រទេសទាំងពីរឲ្យកាន់តែមានភាពអាក្រក់ ៕

ប្រែសម្រួលដោយ ៖​ នាង រតនៈ

ប្រភព ៖ Nikkei Asia

ចុចអាន ៖ បណ្ដុំវីដេអូ អគ្គិភ័យឆាបឆេះអគារខ្ពស់កប់ពពកនៅ ហុងកុង