អ្នកវិទ្យាសាស្ត្ររកឃើញច្រករបៀងថ្មី ក្នុងមហាពីរ៉ាមីតនៃជីហ្សា

កាលពីថ្ងៃព្រហស្បតិ៍ ទី០២ ខែមីនា មន្ត្រីវត្ថុបុរាណអេហ្ស៊ីបបានឲ្យដឹងថាច្រករបៀងអាថ៌កំបាំងប្រវែង ៩ ម៉ែត្រ ត្រូវគេរកឃើញនៅជិតច្រកចូលរបស់មហាពីរ៉ាមីតនៃជីហ្សាដែលមានអាយុ ៤,៥០០ ឆ្នាំ ។

មហាពីរ៉ាមីតជាផ្នូរដ៏មហិមាដែលគេសាងសង់នៅឆ្នាំ ២៥៦០ មុនគ្រិស្តសករាជ ក្នុងរជ្ជកាលព្រះចៅផារ៉ាអុង ឃូហ្វូ វាមាន កម្ពស់ ១៣៩ ម៉ែត្រ ហើយជាសំណង់ខ្ពស់ជាងគេមុនឆ្នាំ ១៨៨៩ ដែលបង្កើតឡើងដោយមនុស្ស ។ ការរកឃើញលើកនេះអាចរួមចំណែកដល់ចំណេះដឹងអំពីការសាងសង់ពីរ៉ាមីត និងគោលបំណងនៃរចនាសម្ព័ន្ធថ្មកំបោរដែលនៅពីមុខច្រករបៀងទៀតផង ។

លោក Mostafa Waziri ប្រធានក្រុមប្រឹក្សាជាន់ខ្ពស់នៃវត្ថុបុរាណរបស់ប្រទេសអេហ្ស៊ីប មានប្រសាសន៍ថា “គេសង់ច្រករបៀងក្នុងគោលបំណងចែកចាយទម្ងន់ពីរ៉ាមីតឡើងវិញឬទុកឲ្យអ្នកទេសចរប្រើប្រាស់ ហើយយើងនឹងបន្តការស្កេនសិនព្រោះនៅសល់ជម្រៅ ៧ ម៉ែត្រទៀតដែលមិនទាន់ស្រាវជ្រាវ” ។

ជុំវិញករណីនេះអ្នកវិទ្យាសាស្ត្របានរកឃើញច្រករបៀងតាមរយៈការថតកាំរស្មី cosmic-ray muon មុនពេលទាញយករូបភាពរបស់វាដោយឧបករណ៍ endoscope កម្រាស់ ៦ មិល្លីម៉ែត្រពីប្រទេសជប៉ុន ។

គួររំលឹកដែរថា ក្នុងឆ្នាំ ២០១៧ អ្នកស្រាវជ្រាវធ្លាប់ប្រកាសពីការរកឃើញចន្លោះប្រហោងយ៉ាងហោចណាស់ ៣០ ម៉ែត្រនៅខាងក្នុងពីរ៉ាមីតដ៏អស្ចារ្យម្ដងរួចមកហើយ ៕

ប្រែសម្រួល ៖ វារី

ប្រភព ៖ Asianone

ចុចអាន ៖ សាកសពម៉ាំមី បិទពេញដោយសន្លឹកមាស ត្រូវបានរកឃើញនៅ​ អេហ្ស៊ីប

ចុចអាន ៖ ជប៉ុន រកឃើញរុក្ខជាតិចម្លែកម្ដងទៀត ក្រោយដាច់ពូជរយៈពេល ៣០ ឆ្នាំ