ព័ត៌មានអន្ដរជាតិ

តុលាការ ICC នឹងបើកសំណុំរឿងក្ដីឧក្រិដ្ឋកម្មសង្គ្រាមប្រឆាំង រុស្ស៊ី

បានផុស

២ years មុន

នៅ

ថ្ងៃអង្គារ ១៤ មីនា ២០២៣

ដោយ

កាសែត New York Times បានរាយការណ៍កាលពីថ្ងៃចន្ទថា តុលាការឧក្រិដ្ឋកម្មអន្តរជាតិ (ICC) នឹងបើកសំណុំរឿងក្ដីឧក្រិដ្ឋកម្មសង្គ្រាមចំនួន ២ ប្រឆាំងនឹងរុស្ស៊ី ពាក់ព័ន្ធនឹងប្រតិបត្តិការសឹករបស់ខ្លួននៅក្នុងប្រទេសអ៊ុយក្រែន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាសែតអាមេរិកមួយនេះបានចុះផ្សាយទៀតថា តុលាការដែលមានមូលដ្ឋាននៅទីក្រុងឡាអេ នឹងស្វែងរកដីកាចាប់ខ្លួនជនជាតិរុស្សីជាច្រើននាក់ ដែលត្រូវបានចោទប្រកាន់ពីបទចាប់ពង្រត់កុមារអ៊ុយក្រែន និងកំណត់គោលដៅលើហេដ្ឋារចនាសម្ព័ន្ធស៊ីវិល ។

ករណីទាំងនេះនឹងក្លាយជាការចោទប្រកាន់អន្តរជាតិលើកដំបូង ចាប់តាំងពីជម្លោះក្នុងប្រទេសអ៊ុយក្រែន បានផ្ទុះឡើងកាលពីថ្ងៃទី២៤ ខែកុម្ភៈ ឆ្នាំ ២០២២ ខណៈ ICC ក៏ធ្លាប់បានបើកការស៊ើបអង្កេតលើឧក្រិដ្ឋកម្មសង្គ្រាមនៅអ៊ុយក្រែនកាលពីខែមីនាឆ្នាំមុនផងដែរ ។

ពាក់ព័ន្ធនឹងបញ្ហានេះដែរ រុស្ស៊ីបានបដិសេធរាល់ការចោទប្រកាន់ពីបទឧក្រិដ្ឋកម្មសង្គ្រាម ហើយដីកានេះទំនងជាមិនអាចនាំឲ្យមានការកាត់ទោសនោះទេ ព្រោះទីក្រុងមូស្គូមិនមែនជាភាគីនៃលក្ខន្តិកៈទីក្រុងរ៉ូម ដែលជាសន្ធិសញ្ញាបង្កើតឡើងដោយ ICC ហើយក៏មិនរំពឹងថា នឹងប្រគល់ជនជាប់ចោទណាមួយទៅឲ្យតុលាការផងដែរ ។

គួរបញ្ជាក់ថា រហូតមកដល់ពេលនេះ ប្រតិបត្តិការសឹករបស់រុស្ស៊ីលើអ៊ុយក្រែន បានអូសបន្លាយពេលជាង ១ ឆ្នាំមកហើយ ខណៈក៏មិនទាន់មានសញ្ញាថមថយណាមួយនៅឡើយផងដែរ ស្របពេលដែលបច្ចុប្បន្នកងកម្លាំងទីក្រុងមូស្គូ កាន់តែបើកការវាយលុកយ៉ាងសន្ធាប់លើទីក្រុង Bakhmut ភាគខាងកើតអ៊ុយក្រែន ៕