ទីបំផុត អាមេរិក បញ្ចេញវីដេអូឃ្លីប នៃ​ការ​ប៉ះទង្គិច រវាងដ្រូនរបស់ខ្លួន និង​យន្តហោះ​ចម្បាំង​រុស្ស៊ី

សហរដ្ឋអាមេរិកកាលពីថ្ងៃព្រហស្បតិ៍ទី១៦ខែមីនា បានបញ្ចេញវីដេអូ ដែលបង្ហាញពីការស្ទាក់ចាប់របស់រុស្ស៊ី ចំពោះដ្រូនឃ្លាំមើលយោធាអាមេរិក ដែលបានធ្លាក់នៅសមុទ្រខ្មៅកាលពីពីរថ្ងៃមុន។

ការទម្លាក់ដ្រូន MQ-9 របស់អាមេរិកកាលពីថ្ងៃអង្គារ គឺជាឧប្បត្តិហេតុផ្ទាល់លើកដំបូងរបស់សហរដ្ឋអាមេរិក និងរុស្ស៊ី ចាប់តាំងពីសង្រ្គាមអ៊ុយក្រែនផ្ទុះឡើង ដែលធ្វើឲ្យទំនាក់ទំនងដ៏តានតឹងរវាងទីក្រុងវ៉ាស៊ីនតោន និងមូស្គូកាន់តែអាក្រក់ទៅៗ។

នៅក្នុងវីដេអូ យន្តហោះចម្បាំង Su-27 របស់រុស្ស៊ី ត្រូវបានគេមើលឃើញ ចូលជិតដ្រូន ហើយបង្ហូរប្រេងជិតនោះ នៅក្នុងអ្វីដែលមន្ត្រីអាមេរិកនិយាយថា ជាកិច្ចខិតខំប្រឹងប្រែងយ៉ាងជាក់ស្តែង ដើម្បីបំផ្លាញដ្រូនអាមេរិកនៅពេលហោះហើរ។

វីដេអូស្រាប់តែដាច់សញ្ញា បន្ទាប់ពីយន្តហោះរុស្ស៊ីមួយគ្រឿងទៀតហោះមកជិត ដែលមន្ទីរបញ្ចកោណនិយាយថា បណ្តាលមកពីយន្តហោះរុស្ស៊ីបុកជាមួយដ្រូន។ វីដេអូនេះបញ្ចប់ជាមួយរូបភាពដែលបង្ហាញពីដ្រូនអាមេរិក ខូចស្លាប។

មន្ទីរបញ្ចកោណនិយាយថា វីដេអូដែលមានរយៈពេលប្រហែល៤០វិនាទីមួយនេះ ត្រូវបានកែសម្រួលដោយយោធាអាមេរិក ប៉ុន្តែបង្ហាញព្រឹត្តិការណ៍តាមលំដាប់លំដោយ។

ប្រទេសរុស្ស៊ី បានបដិសេធការចោទប្រកាន់របស់សហរដ្ឋអាមេរិកដែលថា យន្តហោះរបស់ខ្លួនបានធ្វើសកម្មភាពដោយមិនប្រុងប្រយ័ត្នក្នុងឧប្បត្តិហេតុកាលពីថ្ងៃអង្គារ ហើយជំនួសមកវិញបានស្តីបន្ទោសការធ្វើសមយុទ្ធមុតស្រួច ដោយដ្រូនអាមេរិក។

ទោះបីជាយ៉ាងណាក៏ដោយ អ្នកនាំពាក្យសេតវិមានលោក John Kirby បានប្រាប់អ្នកយកព័ត៌មានថា “រុស្ស៊ីបាននិយាយកុហកអំពីអ្វីដែលកើតឡើង ឬអ្វីដែលមិនបានកើតឡើង។ ច្បាស់ណាស់ នៅពេលអ្នកមើលវីដេអូនេះ យន្តហោះចម្បាំងបានបុកដ្រូនរបស់យើង”៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNA

ចុចអាន៖ រុស្ស៊ី៖ ឧប្បត្តិហេតុយន្តហោះគ្មានមនុស្សបើក បញ្ជាក់ពីការចូលរួមរបស់អាមេរិក នៅក្នុងជម្លោះអ៊ុយក្រែន