EU ពួតដៃគ្នាបញ្ជូនគ្រាប់កាំភ្លើងធំ ១ លានគ្រាប់បន្ថែមទៀតឲ្យ អ៊ុយក្រែន

ប្រធានក្រុមប្រឹក្សាអឺរ៉ុបលោក Charles Michel បាននិយាយកាលពីថ្ងៃចន្ទថា សហភាពអឺរ៉ុប (EU) នឹងបញ្ជូនគ្រាប់កាំភ្លើងធំចំនួន ១ លានគ្រាប់បន្ថែមទៀតទៅឲ្យអ៊ុយក្រែនក្នុងរយៈពេល ១២ ​ខែ ។

ទីភ្នាក់ងារសារព័ត៌មានបារាំងបានរាយការណ៍ថា សហភាពអឺរ៉ុបបានព្រមព្រៀងគ្នាលើផែនការផ្តល់គ្រាប់កាំភ្លើងធំសម្រាប់អ៊ុយក្រែនក្នុងទំហំទឹកប្រាក់ ២.១ ពាន់លានដុល្លារ ។

លោក Michel បានបង្ហោះលើបណ្ដាញ Twitter ថា EU នៅតែបន្តគាំទ្រអ៊ុយក្រែនជានិច្ច ហើយគ្រាប់កាំភ្លើងធំជាង ១ លានគ្រាប់បន្ថែមទៀតនេះ នឹងទៅដល់ដៃអ៊ុយក្រែនក្នុងពេលឆាប់ៗនេះ ។

គួរឲ្យដឹងថា ប្រទេសលោកខាងលិច បានបង្កើនការគាំទ្រផ្នែកយោធាជាបន្តបន្ទាប់ដល់អ៊ុយក្រែន បន្ទាប់ពីរុស្ស៊ីចាប់ផ្តើមប្រតិបត្តិការសឹកកាលពីថ្ងៃទី២៤ ខែកុម្ភៈ ឆ្នាំ ២០២២ ខណៈជំនួយទាំងនោះរួមមាន មីស៊ីលការពារដែនអាកាស ប្រព័ន្ធបាញ់គ្រាប់រ៉ុកកែត រថក្រោះ កាំភ្លើងធំបាញ់ស្វ័យប្រវត្តិ កាំភ្លើងប្រឆាំងយន្តហោះ និងប្រភេទគ្រាប់រំសេវផ្សេងៗជាដើម ៕​

ប្រែសម្រួលដោយ ៖ នាង រតនៈ

ប្រភព ៖ Sputnik

ចុចអាន ៖ យន្តហោះចម្បាំង Su-35 របស់ រុស្ស៊ី ស្ទាក់ចាប់យន្តហោះទម្លាក់គ្រាប់បែក អាមេរិក លើសមុទ្របាល់ទិក