ទ័ពអ៊ុយក្រែន បញ្ចប់ការបណ្តុះបណ្តាលនៅអង់គ្លេស បានទាំងរថក្រោះវិលទៅមាតុភូមិវិញ ទុកបាញ់រុស្ស៊ី (មានវីដេអូ)

កងទ័ពអ៊ុយក្រែនដែលទទួលការបណ្តុះបណ្តាលដោយចក្រភពអង់គ្លេស ពេលនេះបានវិលត្រលប់ទៅមាតុភូមិវិញហើយជាមួយនឹងរថក្រោះ Challenger 2 ដើម្បីប្រយុទ្ធប្រឆាំងនឹងការលុកលុយរបស់លោក វ្ល៉ាឌីមៀរ ពូទីន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កងទ័ពទាំងនេះ បាន​ទៅដល់​អង់គ្លេស ​បន្ទាប់ពីសេចក្តី​ប្រកាស​កាលពី​ខែមករា​ថា ទីក្រុងឡុងដ៍​នឹង​បរិច្ចាគ​រថក្រោះ​ចំនួន ១៤គ្រឿង​ឲ្យ​ប្រទេស​អ៊ុយ​ក្រែ​ន​។

ឥឡូវ ពួកគេបានវិលត្រលប់វិញហើយជាមួយនឹងរថក្រោះ ពោលគឺទាន់ពេលវេលាសម្រាប់ការវាយបកតបតរបស់ទីក្រុងកៀវ នានិទាឃរដូវ ។

សម្រាប់ការបណ្តុះបណ្តាលគឺរួមមានវិធីបញ្ជា ការបើកបរ និងរបៀបធ្វើការរួមគ្នាជាក្រុមជាមួយរថក្រោះ Challenger 2 ថែមទាំងការកំណត់គោលដៅសម្រាប់វាយប្រហារផងដែរ។

រដ្ឋមន្ត្រីការពារជាតិអង់គ្លេសលោក Ben Wallace និយាយថា “នេះគឺជាកម្លាំងជំរុញ ចំពោះការប្តេជ្ញាចិត្តរបស់ទាហានអ៊ុយក្រែន ដែលបានបញ្ចប់ការហ្វឹកហ្វឺនលើរថក្រោះ Challenger 2 នៅលើដីចក្រភពអង់គ្លេស។ យើង​នឹង​បន្ត​ធ្វើ​ឲ្យ​អស់​ពី​សមត្ថភាព​ដើម្បី​គាំទ្រ​អ៊ុយក្រែន​ឲ្យ​បាន​យូរ​តាម​ដែល​ពួកគេត្រូវ​ការ”។

គួររម្លឹកថា អ៊ុយក្រែន ក៏បានទទួលរថក្រោះខ្លារខិន២ ឬ Leopard 2 ចំនួន៨គ្រឿងពីប្រទេសន័រវែសរួចហើយដែរ ហើយបន្ថែមពីលើគ្រឿងសឹកដែលបរិច្ចាគ, យានគាំទ្រ គ្រាប់រំសេវ និងគ្រឿងបន្លាស់ក៏ត្រូវបានន័រវែសបញ្ជូនទៅអ៊ុយក្រែនផងដែរ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ រថក្រោះខ្លារខិនរបស់ន័រវែស ទៅដល់ដៃ អ៊ុយក្រែន ហើយ