អង់គ្លេស ព្រមានខ្លាំងៗអំពីការវាយប្រហារភេរវកម្មនៅអៀរឡង់ខាងជើង មុនដំណើរទស្សនកិច្ចរបស់លោក ចូ​ បៃដិន (មានវីដេអូ)

រាជរដ្ឋាភិបាលចក្រភពអង់គ្លេសកាលពីថ្ងៃអង្គារទី២៨ខែមីនា បានបង្កើនកម្រិតគំរាមកំហែងភេរវកម្មនៅអៀរឡង់ខាងជើង ឡើងដល់ “កម្រិតធ្ងន់ធ្ងរ” មុនដំណើរទស្សនកិច្ចរបស់ប្រធានាធិបតីអាមេរិកលោក ចូ បៃដិន ដើម្បីប្រារព្ធខួបលើកទី២៥នៃកិច្ចព្រមព្រៀងសន្តិភាពដ៏សំខាន់មួយ។

បច្ចុប្បន្ន ទីភ្នាក់ងារចារកម្មក្នុងស្រុក MI5 បានវិនិច្ឆ័យថា កម្រិតគំរាមកំហែងនៃការវាយប្រហារបានផ្លាស់ប្តូរពី “ខ្លាំង” ទៅ “ធ្ងន់ធ្ងរ” ដែលមានន័យថា ឧប្បត្តិហេតុមួយទំនងជាកើតឡើង។ នេះបើយោងតាមការព្រមានពីលេខាធិការអៀរឡង់ខាងជើងលោក Chris Heaton-Harris។

បន្ទាប់ពីទទួលរងនូវភាពចលាចលបង្ហូរឈាមអស់រយៈពេល៣ទសវត្សរ៍, អៀរឡង់ខាងជើងក៏បានផ្លាស់ប្តូរជំហរ ចាប់តាំងពីកិច្ចព្រមព្រៀង Good Friday ត្រូវបានអនុម័តនៅថ្ងៃទី១០ខែមេសាឆ្នាំ១៩៩៨។

លោក Heaton-Harris បានប្រាប់សភាថា “មនុស្សមួយចំនួនតូចនៅតែតាំងចិត្តថា នឹងបង្កគ្រោះថ្នាក់ដល់សហគមន៍របស់យើង តាមរយៈអំពើហិង្សាដែលជំរុញដោយរឿងនយោបាយ”។

ស្របពេលជាមួយគ្នានោះដែរ លោក​បាន​ជំរុញ​ដល់​សាធារណជន ​ឲ្យ​មាន​ការ​ប្រុង​ប្រយ័ត្ន ប៉ុន្តែ​កុំ​មាន​ការ​ភ្ញាក់​ផ្អើលឲ្យសោះ​ចំពោះសេចក្តី​ប្រកាស​នេះ។

គួរបញ្ជាក់ថា ខួប Good Friday លើកនេះ គឺកើតឡើងចំពេលអៀរឡង់ខាងជើង ត្រូវជាប់គាំងក្នុងបញ្ហាផ្នែកនយោបាយ ខណៈក្រុមសហជីពគាំទ្រចក្រភពអង់គ្លេស បដិសេធចូលរដ្ឋាភិបាលជាថ្មី ជាការជំទាស់នឹងកិច្ចព្រមព្រៀងពាណិជ្ជកម្មក្រោយ Brexit ដែលយល់ព្រមដោយទីក្រុងឡុងដ៍ និងសហភាពអឺរ៉ុប។

ពួកសកម្មប្រយុទ្ធជ្រុលនិយមកាន់តែច្រើននៅក្នុងជំរំគាំទ្រចក្រភពអង់គ្លេសបាន ចេញការព្រមានជាបន្តបន្ទាប់អំពីផលវិបាកនៃកិច្ចព្រមព្រៀងនេះ ដែលពួកគេមើលឃើញថា ធ្វើឲ្យអៀរឡង់ខាងជើង ប្រឈមនឹងហានិភ័យនៃការបែកបាក់ផ្នែកនយោបាយ និងសេដ្ឋកិច្ចពីចក្រភពអង់គ្លេស៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNA

ចុចអាន៖ ឆ្នាំ២០៣០ អង់គ្លេស នឹងបញ្ជូនមនុស្សយន្តទៅប្រយុទ្ធនៅលើសមរភូមិ