២ ខែទៀតទើប អ៊ុយក្រែន អាចប្រើរថក្រោះខ្លារខិន Leopard លើសមរភូមិ​ប្រយុទ្ធបាន

រដ្ឋមន្ត្រីការពារជាតិអ៊ុយក្រែនលោក អូឡេកស៊ី រ៉េសនីកូវ (Oleksii Reznikov) បានប្រាប់ប្រព័ន្ធផ្សព្វផ្សាយអេស្តូនីកាលពីពេលថ្មីៗនេះថា រថក្រោះខ្លារខិន Leopard 2 ដែលរដ្ឋាភិបាលទីក្រុងកៀវទើបតែទទួលបានពីដៃគូសម្ព័ន្ធមិត្ត ប្រហែលជាត្រូវប្រើប្រាស់លើសមរភូមិប្រយុទ្ធជាមួយរុស្ស៊ីក្នុងរយៈពេល ២ ខែទៀត ។

លោក រ៉េសនីកូវ បាននិយាយថា យើងអាចនឹងប្រើប្រាស់រថក្រោះខ្លារខិន Leopard 2 សម្រាប់សមរភូមិប្រយុទ្ធប្រឆាំងនឹងកងកម្លាំងរុស្ស៊ី ក្នុងរយៈពេល ២ ខែទៀត ដោយអាស្រ័យលើលក្ខខណ្ឌអាកាសធាតុក្នុងតំបន់របស់អ៊ុយក្រែន ។

ខណៈសង្គ្រាមបានអូសបន្លាយពេលជាង ១ ឆ្នាំមកនេះ អ៊ុយក្រែនក៏ទទួលបានរថក្រោះខ្លារខិនធុន Leopard ជាច្រើនគ្រឿងពីបណ្ដាប្រទេសនៅអឺរ៉ុបដូចជា អាល្លឺម៉ង់ ន័រវែស និងអេស្ប៉ាញជាដើម ដើម្បីប្រើប្រាស់ទប់ទល់នឹងកងកម្លាំងរុស្ស៊ី ជាពិសេសនៅទីក្រុងបាក់មុត (Bakhmut) ។

បច្ចុប្បន្នទីក្រុងជីករ៉ែអំបិលនៅភាគខាងកើតមួយនេះកំពុងត្រូវបានឡោមព័ទ្ធដោយកងកម្លាំងរុស្ស៊ី បន្ទាប់ពីមានការវាយសន្ធាប់ពីសំណាក់ទាហានស៊ីឈ្នួលរុស្ស៊ី Wagner Group ។

គួរបញ្ជាក់ថា ជ័យជម្នះនៅទីក្រុង បាក់មុត ដែលមានប្រជាជនមុនសង្រ្គាមប្រហែល ៧ ម៉ឺននាក់ នឹងផ្តល់ឲ្យរុស្ស៊ីនូវរង្វាន់ធំទីមួយនៃការវាយលុករដូវរងា បន្ទាប់ពីបានកែនទាហានបម្រុងរាប់សែននាក់កាលពីឆ្នាំមុន ហើយវាក៏នឹងក្លាយជាជំហានមួយទៀតដើម្បីដណ្តើមយកតំបន់ដុនបាស់ (Donbas) ដែលជាគោលដៅសង្គ្រាមដ៏សំខាន់របស់រុស្ស៊ីផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK