សហរដ្ឋអាមេរិក ប្រឈមផ្ទុះអំពើហិង្សា ជុំវិញការចោទប្រកាន់លោក ត្រាំ

លោក ដូណាល់​ ត្រាំ បានក្លាយជាអតីតប្រធានាធិបតីសហរដ្ឋអាមេរិកដំបូងគេ ដែលរងការចោទប្រកាន់ព្រហ្មទណ្ឌ ពាក់ព័ន្ធការសូកប៉ាន់បំបិតមាត់តារាអាសអាភាសឈ្មោះ Stormy Daniels។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បាតុកម្ម ជាពិសេសអំពីអំពើហិង្សា ទំនងជាកើតឡើងនៅប៉ុន្មានថ្ងៃខាងមុខ ដោយសារតែកាលពីពាក់កណ្តាលខែមីនា លោក ត្រាំ ធ្លាប់បានជំរុញឲ្យអ្នកគាំទ្ររបស់គាត់ ចេញតវ៉ាក្នុងករណីដែលគាត់ត្រូវបានគេចាត់ខ្លួនជាយថាហេតុ។

លោកស្រី Taylor Greene តំណាងរាស្រ្តគណបក្សសាធារណរដ្ឋនៃរដ្ឋ Georgia និងជាអ្នកការពារលោក ត្រាំ ខ្លាំងបំផុតបានបង្ហោះ Twitter កាលពីថ្ងៃសុក្រទី៣១ខែមីនាថា “ខ្ញុំនឹងទៅញូវយ៉កនៅថ្ងៃអង្គារ។ យើងត្រូវតែតវ៉ាចំពោះការចោទប្រកាន់ដែលមិនស្របតាមរដ្ឋធម្មនុញ្ញ!”។

ស្របពេលជាមួយគ្នានោះ លោក Jesse Watters ពិធីកររបស់ទូរទស្សន៍ Fox News បានព្រមានកាលពីថ្ងៃព្រហស្បតិ៍ថា ប្រទេសនេះនឹងមិននៅស្ងៀមឡើយ ចំពោះការចោទប្រកាន់លោក ត្រាំ ហើយប្រជាជនត្រូវប្រុងប្រយ័ត្នជានិច្ច។

អ្នកសាធារណរដ្ឋឈានមុខមួយចំនួនទៀត ក៏បានបង្ហាញសញ្ញានៃការតវ៉ារីករាលដាលជុំវិញការចោទប្រកាន់លោក ត្រាំ ផងដែរ ប៉ុន្តែបានអំពាវនាវឲ្យធ្វើបាតុកម្មដោយសន្តិវិធី។

ទោះបីជាយ៉ាងណាក៏ដោយ គេរំពឹងថា នឹងមានវត្តមានប៉ូលិសយ៉ាងច្រើនក្រាស់ក្រែលនៅជុំវិញតុលាការ Manhattan ជាកន្លែងដែលលោក ត្រាំ នឹងត្រូវជំនុំជម្រះក្តីនៅថ្ងៃអង្គារ៕

ប្រែសម្រួល៖ Vann Vann

ប្រភព៖ The Hill

ចុចអាន៖ អាមេរិក ប្រឈមការបែកបាក់ផ្ទៃក្នុង ខណៈលោក ត្រាំ អាចនឹងត្រូវវាយខ្នោះ ចូលតុលាការ