កុមារក្នុងចំណោមមនុស្ស ៨នាក់ បានស្លាប់ក្នុងការវាយប្រហាររបស់យោធាមីយ៉ាន់ម៉ា

យោងតាមក្រុមសិទ្ធិមនុស្ស ក្រុមឧទ្ទាមជនជាតិភាគតិច និងប្រព័ន្ធផ្សព្វផ្សាយ បានឱ្យដឹងថា យ៉ាងហោចណាស់ជនស៊ីវិល ៨នាក់ រួមទាំងកុមារត្រូវបានសម្លាប់នៅក្នុងការវាយប្រហារតាមអាកាសលើភូមិមួយ នៅភាគពាយព្យ ប្រទេសមីយ៉ាន់ម៉ា។

យោងតាមអង្គការសិទ្ធិមនុស្ស Chin (CHRO) និងរណសិរ្សជាតិ Chin បានឱ្យដឹងថា ការវាយប្រហារតាមអាកាសបានកើតឡើងកាលពីថ្ងៃព្រហស្បតិ៍ ទី៣០ ខែមីនា ដោយគ្រាប់បែកចំនួន ៤គ្រាប់ បានទម្លាក់លើភូមិ Khuafo ដែលជាភូមិមានប្រជាជនរស់នៅប្រហែល ៦០គ្រួសារ ក្នុងរដ្ឋ Chin ជាប់ព្រំដែន ប្រទេសឥណ្ឌា។

របាយការណ៍បាន​និយាយ​ថា ក្នុងចំណោមជនរងគ្រោះទាំង ៨នាក់ មានកុមារ​អាយុ​ ៣​ឆ្នាំម្នាក់ ​និងអាយុ ​៩​ឆ្នាំម្នាក់បានស្លាប់ក្នុងហេតុការណ៍វាយប្រហារ។

យ៉ាងណាមិញ សារព័ត៌មាន Myanmar Now, Irrawaddy និង BBC ភូមា បានរាយការណ៍ថា មានអ្នកស្លាប់ចំនួន ១០នាក់ពីឧបទ្ទវហេតុនេះ ក្នុងនោះមានស្ត្រី និងកុមារផងដែរ។

ដោយឡែកអ្នកនាំពាក្យរបស់រណសិរ្សជាតិចិន (CNF) បានប្រាប់រ៉យទ័រថា មនុស្ស ១០នាក់បានស្លាប់ និង ២០នាក់បានរងរបួស៕

ប្រែសម្រួល៖ សន្យា

ចុចអាន៖ ក្រសួងការពារជាតិថា យន្តហោះចម្បាំងចិន ១០គ្រឿង បានឆ្លងចូលច្រកសមុទ្រតៃវ៉ាន់

ចុចអាន៖ កម្រិតខ្យល់ពុលធ្ងន់ធ្ងរនៅ ឈៀងម៉ៃ បណ្តាលឲ្យមនុស្សជាង ១ម៉ឺននាក់ ត្រូវបញ្ជូនទៅមន្ទីរពេទ្យ