កូរ៉េខាងជើងចោទថា អ៊ុយក្រែនមានមហិច្ឆិតានុយក្លេអ៊ែរ

ប្រព័ន្ធផ្សព្វផ្សាយរដ្ឋ KCNA របស់កូរ៉េខាងត្បូង បានរាយការណ៍ កាលពីថ្ងៃសៅរ៍ ទី១ ខែមេសា ថា លោកស្រី Kim Yo Jong ដែលជាប្អូនស្រីរបស់មេដឹកនាំ Kim Jong Un បានចោទប្រកាន់ប្រទេសអ៊ុយក្រែនថាបានអំពាវនាវឱ្យមានអាវុធនុយក្លេអ៊ែរ។

ការចោទប្រកាន់នេះ កើតឡើងបន្ទាប់ពីគេហទំព័ររបស់ប្រធានាធិបតីអ៊ុយក្រែនបានដាក់ញ្ញត្តិមួយស្នើហត្ថលេខា សុំឱ្យអ៊ុយក្រែនធ្វើជាម្ចាស់ផ្ទះអាវុធនុយក្លេអ៊ែរ ឬឱ្យប្រទេសនេះបំពាក់អាវុធដោយផ្ទាល់ជាមួយនឹងអាវុធនុយក្លេអ៊ែររបស់ខ្លួន។

អ្នកស្រី Kim Yo Jong អះអាងថា ញត្តិតាមអ៊ីនធឺណិតនៅក្នុងប្រទេសអ៊ុយក្រែន ដែលមានហត្ថលេខាមិនដល់ ១ពាន់នាក់ផងនោះ អាចជាផែនការនយោបាយដោយការិយាល័យប្រធានាធិបតី Volodymyr Zelenskiy ប៉ុន្តែអ្នកស្រីមិនបានផ្តល់ភស្តុតាងណាមួយចំពោះការអះអាងរបស់ខ្លួននោះទេ។

បន្ទាប់ពីប្រធានាធិបតីរុស្ស៊ី លោក វ្ល៉ាឌីមៀ ពូទីន ប្រកាសកាលពីសប្តាហ៍មុនថា ទីក្រុងមូស្គូមានគម្រោងដាក់ពង្រាយអាវុធនុយក្លេអ៊ែរយុទ្ធសាស្ត្រនៅក្នុងប្រទេសបេឡារុស្ស ញត្តិសាធារណៈមួយត្រូវបានដាក់ទៅកាន់គេហទំព័ររបស់ប្រធានាធិបតីអ៊ុយក្រែន កាលពីថ្ងៃព្រហស្បតិ៍ ដោយញ្ញត្តិនោះអំពាវនាវឱ្យអ៊ុយក្រែនធ្វើជាម្ចាស់ផ្ទះអាវុធនុយក្លេអ៊ែរ។

គិតត្រឹមរសៀលថ្ងៃសៅរ៍ ញត្តិទទួលបានហត្ថលេខាត្រឹមតែ ៦១១នាក់ប៉ុណ្ណោះ ដែលគោលដៅត្រូវទទួលបានហត្ថលេខាហោចណាស់ចំនួន ២៥,០០០នាក់ ដែលនេះជាការអំពាវនាវរបស់លោក Zelenskiy ។ មកដល់ថ្ងៃនេះ មន្ត្រីទីក្រុង កៀវ មិន​បាន​ធ្វើ​អត្ថាធិប្បាយ​លើ​ញត្តិ​នោះនៅឡើយ​ទេ​៕

ប្រែសម្រួល៖ សន្យា

ប្រភព៖ Reuters

ចុចអាន៖ កុមារក្នុងចំណោមមនុស្ស ៨នាក់ បានស្លាប់ក្នុងការវាយប្រហាររបស់យោធាមីយ៉ាន់ម៉ា