បុរសម៉ិកស៊ិក បើកឡានបុក យន្តហោះ

បុរសម្នាក់ បានបុកឡានដឹកទំនិញ បុកយន្តហោះដឹកអ្នកដំណើរនៅឯអាកាសយានដ្ឋានមួយ នាភាគខាងលិចប្រទេសម៉ិកស៊ិកកាលពីចុងសប្តាហ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វីដេអូមិននឹកស្មានដល់នេះ បានបង្ហាញឲ្យឃើញឡានដឹកទំនិញ បើកទៅបុកកន្ទុយយន្តហោះ Viva Aerobus ដែលកំពុងចត ទាំងមានអ្នកដំណើរពេញយន្តហោះ។

យន្តហោះនេះ គ្រោងចេញដំណើរពីអាកាសយានដ្ឋានអន្តរជាតិ Guadalajara ឆ្ពោះទៅកាន់ទីក្រុង Los Angeles ប៉ុន្តែអ្នកដំណើរទាំងអស់ត្រូវចុះវិញ ដោយសារកន្ទុយយន្តហោះត្រូវធ្លុះក្រោយឡានបុក។

ក្រោយមក ក្រុមហ៊ុន​ Viva Aerobus បាននិយាយនៅក្នុងសេចក្តីថ្លែងការណ៍មួយថា អ្នកបើកបររូបនោះ កំពុងបើកឡានដឹកម្ហូបអាហារ យកទៅឲ្យអ្នកដំណើរក្នុងយន្តហោះមួយគ្រឿងផ្សេងទៀតដែលស្ថិតនៅជិតនោះ ប៉ុន្តែអ្នកបើកឡានស្រាប់តែសន្លប់ភ្លាមៗដោយមិនដឹងមូលហេតុ។

យ៉ាងណាក្តី បុគ្គលិកក្នុងយន្តហោះ Viva Aerobus អាចនាំអ្នកដំណើរទាំងអស់ចេញដោយសុវត្ថិភាព ហើយមិនមានអ្នកដំណើរ ឬអាកាសយានិកណាម្នាក់រងរបួសនោះទេ។

ស្ថានភាព​របួស​របស់​អ្នក​ឡាន ក៏​មិន​ត្រូវ​បាន​គេបញ្ជាក់ដែរ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ រថយន្ត បុកគ្នាជាមួយ យន្តហោះ នៅ ប៉េរូ