ព័ត៌មានអន្ដរជាតិ

អ៊ុយក្រែន សុខចិត្តបើកទំព័រចរចាជាមួយ រុស្ស៊ី តែមានលក្ខខណ្ឌមួយ

បានផុស

២ years មុន

នៅ

ថ្ងៃព្រហស្បតិ៍ ៦ មេសា ២០២៣

ដោយ

មន្ត្រីជាន់ខ្ពស់អ៊ុយក្រែនមួយរូបបានអះអាងថា រដ្ឋាភិបាលទីក្រុងកៀវនឹងសុខចិត្តចរចាជាមួយទីក្រុងមូស្គូ ប្រសិនបើកងទ័ពរបស់ប្រទេសនេះ ចូលទៅដល់តំបន់គ្រីមៀ ដែលគ្រប់គ្រងដោយរុស្ស៊ី បូករួមជាមួយនឹងលក្ខខណ្ឌផ្សេងទៀត ផងដែរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមនោះ ក្រុមអ្នកសង្កេតការណ៍ក៏បានឲ្យដឹងដែរថា កងកម្លាំងអ៊ុយក្រែនអាចប្រើប្រាស់រថក្រោះ និងអាវុធផ្សេងទៀតដែលផ្គត់ផ្គង់ដោយប្រទេសលោកខាងលិច ដើម្បីចាប់ផ្តើមការវាយលុកទ្រង់ទ្រាយធំនៅចុងខែមីនានេះ ហើយអាចនឹងបន្តដល់ខែមិថុនា ។

ស្របពេលជាមួយគ្នានេះ លោក Andriy Sybiha អនុប្រធានការិយាល័យរបស់ប្រធានាធិបតីអ៊ុយក្រែនលោក Volodymyr Zelensky បានប្រាប់កាសែត The Financial Times នៅក្នុងបទសម្ភាសន៍មួយកាលពីថ្ងៃពុធថា “ប្រសិនបើយើងសម្រេចបាននូវគោលដៅយុទ្ធសាស្រ្តនៅលើសមរភូមិ ជាពិសេសនៅពេលដែលយើងទទួលបានជោគជ័យនៅលើព្រំដែនរដ្ឋបាលជាមួយតំបន់គ្រីមៀនោះ ពួកយើងបានត្រៀមខ្លួនរួចរាល់ហើយ ក្នុងការបើកទំព័រការទូតដើម្បីពិភាក្សាអំពីបញ្ហាទាំងអស់” ។

មន្ត្រីរូបនេះបានបន្ថែមថា “ក្នុងន័យនេះមិនមែនមានន័យថា យើងដកផ្លូវរំដោះ ឬដកកងទ័ព នៅពេលដែលយើងឈានជើងដល់តំបន់គ្រីមៀនោះទេ ប៉ុន្តែយើងក៏បានពិចារណាលើផែនការដណ្តើមយកតំបន់មួយនេះមកវិញដោយកម្លាំងផងដែរ” ។

ពាក់ព័ន្ធនឹងបញ្ហានេះដែរ លោក Zelensky ក៏ធ្លាប់បានលើកឡើងយ៉ាងមុតមាំផងដែរថា អ៊ុយក្រែននឹងមិនធ្វើសម្បទានទឹកដីរបស់ខ្លួននោះទេ ។ អ៊ុយក្រែនមានតែព្យាយាមដណ្តើមយកតំបន់ដែលកាន់កាប់ដោយរុស្ស៊ីមកវិញទាំងអស់ តាមគ្រប់មធ្យោបាយដែលមាន ។

គួរបញ្ជាក់ថា រហូតមកដល់ពេលនេះ ប្រតិបត្តិការសឹករបស់រុស្ស៊ីលើអ៊ុយក្រែន បានអូសបន្លាយពេលជាង ១ ឆ្នាំមកហើយ ខណៈរដ្ឋាភិបាលទីក្រុងកៀវក៏ទទួលបានជំនួយជាសព្វាវុធជាហូរហែផងដែរ ដើម្បីទប់ទល់នឹងកងកម្លាំងទីក្រុងមូស្គូដែលកំពុងតែវាយសន្ធាប់នៅតំបន់ភាគខាងកើត ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ EU ថា ចិន មានឥទ្ធិលពលបំផុតក្នុងការដោះស្រាយសន្តិភាពនៅ អ៊ុយក្រែន