បែកធ្លាយឯកសារកំពូលសម្ងាត់របស់ណាតូ, អាមេរិក កំពុងបារម្ភ

កាសែត New York Times បានរាយការណ៍ថា ការលេចធ្លាយនូវឯកសារសម្ងាត់ ដែលរៀបរាប់អំពីផែនការសង្រ្គាមរបស់អាមេរិក និងអង្គការណាតូនៅអ៊ុយក្រែន បានបង្កឲ្យមានការស៊ើបអង្កេតយោធារបស់សហរដ្ឋអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកសារទាំងនេះ ដែលមានខ្លះត្រូវបានគេចាត់ទុកថាជា “ឯកសារកំពូលអាថ៌កំបាំង” គឺបង្ហាញពីកម្លាំងទាហាន ពេលវេលាសម្រាប់ការដឹកជញ្ជូនអាវុធ និងការចំណាយគ្រាប់រំសេវ ព្រមទាំងទិន្នន័យផ្សេងទៀត។

ឯកសារ បានលេចឡើងលើប្រព័ន្ធផ្សព្វផ្សាយសង្គមកាលពីដើមសប្តាហ៍នេះ ហើយថ្វីបើគេមិនដឹងថាតើវាលេចធ្លាយចេញពីណាក៏ដោយ ប៉ុន្តែការលេចធ្លាយនេះបានបង្កក្តីព្រួយបារម្ភនៅក្នុងក្រសួងការពារជាតិអាមេរិក ហើយមន្ទីរបញ្ចកោណក៏បានចាប់ផ្តើមការស៊ើបអង្កេត។

អ្នកនាំពាក្យមន្ទីរបញ្ចកោណលោកស្រី Sabrina Singh បានប្រាប់កាសែត New York Timesថា “យើងដឹងអំពីរបាយការណ៍នៃការបង្ហោះក្នុងប្រព័ន្ធផ្សព្វផ្សាយសង្គម ហើយក្រសួងកំពុងពិនិត្យមើលបញ្ហានេះ”។

ស្របពេលជាមួយគ្នានោះ ក្រុមមន្ត្រីនិយាយថា ពួកគេកំពុងធ្វើការដើម្បីដកឯកសារចេញពីអ៊ីនធឺណិត ប៉ុន្តែមិនបានជោគជ័យទេ គិតត្រឹមយប់ថ្ងៃព្រហស្បតិ៍ទី០៦ខែមេសា៕

ប្រែសម្រួល៖ Vann Vann

ប្រភព៖ RT

ចុចអាន៖ ណាតូ ព្រមានចិន កុំចូលដៃជាមួយ រុស្ស៊ី ឲ្យសោះ