ចិន​ បញ្ជូន​យន្តហោះ​ និងនាវាចម្បាំង ទៅជិត​កោះ​តៃវ៉ាន់ ២​ថ្ងៃជាប់គ្នា​

ទីក្រុងតៃប៉ិបាននិយាយថា នៅថ្ងៃសុក្រទី០៧ខែមេសា ប្រទេសចិន បានបញ្ជូននាវាចម្បាំង និងយន្តហោះចម្បាំង ទៅជិតកោះតៃវ៉ាន់សម្រាប់ថ្ងៃទី២ជាប់គ្នា បន្ទាប់ពីប្រធានាធិបតីតៃវ៉ាន់លោកស្រី Tsai Ing-wen ធ្វើឲ្យទីក្រុងប៉េកាំងខឹងសម្បា ដោយសារតែជួបជាមួយប្រធានសភាសហរដ្ឋអាមេរិកលោក Kevin McCarthy កាលពីដើមសប្តាហ៍នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការពារជាតិនៅទីក្រុងតៃប៉ិនិយាយថា នាវាចម្បាំងចិនចំនួន០៣គ្រឿង បានធ្វើដំណើរក្នុងដែនទឹកជុំវិញកោះតៃវ៉ាន់ ខណៈយន្តហោះចម្បាំងមួយគ្រឿង និងឧទ្ធម្ភាគចក្រប្រឆាំងនាវាមុជទឹក ក៏បានឆ្លងកាត់តំបន់កំណត់អត្តសញ្ញាណការពារដែនអាកាសរបស់កោះនេះផងដែរ។

កាលពីថ្ងៃពុធ នាវាផ្ទុកយន្តហោះ Shandong របស់ប្រទេសចិន បានធ្វើដំណើរឆ្លងកាត់ដែនទឹកភាគអាគ្នេយ៍កោះតៃវ៉ាន់ តាមផ្លូវឆ្ពោះទៅកាន់មហាសមុទ្រប៉ាស៊ីហ្វិកភាគខាងលិច ពោលគឺប៉ុន្មានម៉ោងមុនពេលលោកស្រី Tsai ជួបលោក McCarthy នៅទីក្រុង Los Angeles។

នាយករដ្ឋមន្ត្រីតៃវ៉ាន់លោក Chen Chien-jen បាននិយាយនៅថ្ងៃសុក្រថា ទីភ្នាក់ងារការពារជាតិ និងសន្តិសុខរបស់កោះតៃវ៉ាន់ កំពុងតាមដានយ៉ាងយកចិត្តទុកដាក់លើការវិវត្តស្ថានការណ៍ ហើយបានស្នើឲ្យសាធារណជន កុំមានក្តីព្រួយបារម្ភ។

គួរបញ្ជាក់ជាថ្មី កាលពីខែសីហាឆ្នាំមុន ប្រទេសចិនបានដាក់ពង្រាយនាវាចម្បាំង មីស៊ីល និងយន្តហោះចម្បាំងជុំវិញកោះតៃវ៉ាន់ ជាការបង្ហាញកម្លាំងទ្រង់ទ្រាយធំបំផុតរបស់ខ្លួនក្នុងរយៈពេលជាច្រើនឆ្នាំ បន្ទាប់ពីអតីតប្រធានសភាអាមេរិកលោកស្រី Nancy Pelosi ធ្វើដំណើរទៅកាន់កោះនេះ៕

ប្រែសម្រួល៖ Vann Vann

ប្រភព៖ CNA

ចុចអាន៖ ចិន បញ្ជូននាវាចម្បាំងទៅក្បែរ តៃវ៉ាន់ ក្រោយលោកស្រី Tsai ជួបប្រធានសភាអាមេរិក