លោកស្រី Tsai និយាយផ្គើន ចិន ក្រោយជួបជាមួយប្រធានសភា អាមេរិក

ថ្លែងក្រោយជំនួបជាមួយប្រធានសភាអាមេរិកគឺលោក Kevin McCarthy នៅរដ្ឋកាលីហ្វ័រញ៉ា, ប្រធានាធិបតីកោះតៃវ៉ាន់លោកស្រី Tsai Ing-wen បានប្តេជ្ញាថា នឹងមិនខ្វល់ពីការគាបសង្កត់ណាមួយរបស់ប្រទេសចិនឡើយ ។

លោកស្រី Tsai បាននិយាយនៅឯអាកាសយានដ្ឋានមួយរបស់អាមេរិក ក្រោយបញ្ចប់ដំណើរទស្សនកិច្ចនៅប្រទេសក្វាតេម៉ាឡា និងបេលី ថា ទោះបីជារដ្ឋាភិបាលចិនមានការខឹងសម្បារយ៉ាងណាក៏ដោយ ប៉ុន្តែមេដឹកនាំទាំងអស់​បាន​បង្ហាញ​ការ​គាំទ្រ​ចំពោះ​ការ​ប្ដេជ្ញា​ចិត្ត​របស់​តៃវ៉ាន់​ក្នុង​ការ​លើក​កម្ពស់​សេរីភាព និង​លទ្ធិប្រជាធិបតេយ្យ ។

ទោះជាយ៉ាងណា ចិនមិនបាននៅស្ងៀមចំពោះបញ្ហានេះនោះទេ ដោយទីបញ្ជាការភូមិភាគខាងកើតរបស់កងទ័ពរំដោះប្រជាជនចិន (PLA) បានប្រកាសធ្វើសមយុទ្ធយោធារយៈពេល ៣ ថ្ងៃនៅជុំវិញច្រកសមុទ្រតៃវ៉ាន់ ចាប់ពីថ្ងៃសៅរ៍នេះតទៅ ។

ទីបញ្ជាការបាននិយាយថា សមយុទ្ធនេះគឺជាការព្រមានដ៏ធ្ងន់ធ្ងរបំផុតប្រឆាំងនឹង “ឯករាជ្យភាពតៃវ៉ាន់” ជាពិសេសការឃុបឃិតរបស់កងកម្លាំងបំបែកខ្លួនជាមួយកងកម្លាំងខាងក្រៅ ហើយបានចាត់ទុកសកម្មភាពនេះថាជាការបង្កហេតុ ។

គួរបញ្ជាក់ថា ជំនួបរវាងលោក Kevin McCarthy ជាមួយនឹងលោកស្រី Tsai Ing-wen គឺជាលើកទីមួយហើយដែលប្រធានសភាអាមេរិក បានជួបមេដឹកនាំតៃវ៉ាន់នៅលើទឹកដីនៃសហរដ្ឋអាមេរិក ៕

ប្រែសម្រួលដោយ ៖ ជីវ័ន្ត

ប្រភព ៖ NHK