លោក គីម ជុងអ៊ុន បាត់មុខពីសម័យប្រជុំសភា

ស្ថាប័ននីតិប្បញ្ញត្តិជាន់ខ្ពស់របស់កូរ៉េខាងជើងបានអនុម័តច្បាប់ចាំបាច់ដើម្បីអនុវត្តយុទ្ធសាស្ត្រអភិវឌ្ឍន៍សេដ្ឋកិច្ចរយៈពេល ៥ ឆ្នាំថ្មីរបស់ប្រទេសនេះ ខណៈមេដឹកនាំលោក គីម ជុងអ៊ុន មិនបានចូលរួមកិច្ចប្រជុំសភានោះទេ ។

កាសែតរបស់គណបក្សពលករដែលកំពុងកាន់អំណាច Rodong Sinmun បាននិយាយនៅថ្ងៃចន្ទនេះថា មហាសន្និបាតប្រជាជនជាន់ខ្ពស់ត្រូវបានធ្វើឡើងនៅរដ្ឋធានីព្យុងយ៉ាងកាលពីថ្ងៃអាទិត្យ និងមានការចូលរួមពីតំណាងមកពីទូទាំងប្រទេស ។

ទន្ទឹមនោះមេដឹកនាំកូរ៉េខាងជើង គីម ជុងអ៊ុន ដែលត្រូវបានគេរំពឹងថានឹងកាន់មុខតំណែងថ្មីនៅក្នុងសម័យប្រជុំនេះមិនបានចូលរួមក្នុងកិច្ចប្រជុំនោះទេ ។

លោក គីម ត្រូវបានគេបោះឆ្នោតជ្រើសរើសជាអគ្គលេខាធិការគណបក្សពលករកំពុងកាន់អំណាចនៅឯសមាជគណបក្សដែលបានបញ្ចប់កាលពីថ្ងៃអង្គារ ខណៈដើមឡើយមុខតំណែងនោះត្រូវបានកាន់កាប់ដោយឪពុករបស់លោកគឺលោក គីម ជុងអ៊ីល ។

មហាសន្និបាតប្រជាជនជាន់ខ្ពស់នោះបានអនុម័តច្បាប់ និងថវិកាដែលចាំបាច់ដើម្បីអនុវត្តផែនការសេដ្ឋកិច្ចរយៈពេល ៥ ឆ្នាំ ខណៈកិច្ចប្រជុំនោះក៏បានប្រកាសសមាជិកថ្មីនៃគណៈរដ្ឋមន្រ្តីផងដែរ ។

បន្ថែមពីនេះមហាសន្និបាតក៏នៅតែសម្រេចរក្សាថវិកាការពារជាតិសម្រាប់ឆ្នាំ ២០២១ ដោយមិនមានការផ្លាស់ប្តូរពីឆ្នាំមុនឡើយពោលគឺ ១៥.៩ ភាគរយនៃថវិកាជាតិ ។

កូរ៉េខាងជើងនិយាយថា ការចំណាយលើវិស័យការពារជាតិរបស់ខ្លួនបានជួយបង្កើនសមត្ថភាពការពារខ្លួនយ៉ាងច្រើន ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ លោក គីម ជុងអ៊ុន ទទួលបានមុខតំណែងស្នងឪពុក

ចុចអាន ៖ នៅថ្ងៃបញ្ចប់សមាជបក្ស លោក គីម ជុងអ៊ុន នៅតែផ្ដោតសំខាន់សកម្មភាពមួយនេះ