នាវាពិឃាដអាមេរិក ចូលជិតកោះគ្រប់គ្រងដោយចិន ចំពេលតៃវ៉ាន់ ត្រូវឡោមព័ទ្ធដោយសមយុទ្ធ 

នៅថ្ងៃចន្ទទី១០ខែមេសា នាវាពិឃាដរបស់កងទ័ពជើងទឹកអាមេរិកមួយគ្រឿង បានធ្វើដំណើរទៅជិតប្រជុំកោះដ៏សំខាន់បំផុតមួយ ដែលគ្រប់គ្រងដោយចិន នៅសមុទ្រចិនខាងត្បូង ក្នុងបេសកកម្មដែលអាមេរិកហៅថា ជាការធ្វើនាវាចរណ៍ដោយសេរី ប៉ុន្តែត្រូវទីក្រុងប៉េកាំង បរិហារថាខុសច្បាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្វីបើសហរដ្ឋអាមេរិក តែងតែអនុវត្តការធ្វើដំណើរបែបនេះ ដើម្បីប្រឆាំងនឹងការទាមទារទឹកដីរបស់ចិន និងរដ្ឋដទៃទៀតនៅក្នុងផ្លូវទឹកយុទ្ធសាស្ត្រនេះក៏ដោយ ប៉ុន្តែសកម្មភាពចុងក្រោយនេះ បានកើតឡើងចំពេលទីក្រុងប៉េកាំង កំពុងធ្វើសមយុទ្ធនៅជុំវិញកោះតៃវ៉ាន់។

កងនាវាចរទី៧របស់ទ័ពជើងទឹកអាមេរិក បាននិយាយថា នាវាពិឃាដ USS Milius បានចូលរួមក្នុងប្រតិបត្តិការធម្មតា នៅចម្ងាយ២២.២២គីឡូម៉ែត្រ ពីថ្មប៉ប្រះទឹក Mischief ក្នុងប្រជុំកោះ Spratly។

ទោះបីជាយ៉ាងណាក៏ដោយ កងទ័ពរំដោះប្រជាជនចិនបាននិយាយថា នាវាអាមេរិកបានចូលដោយខុសច្បាប់ទៅជិតតំបន់ថ្មប៉ប្រះទឹក ទាំងដែលគ្មានការយល់ព្រមពីចិន ហើយកងកម្លាំងរបស់ខ្លួនបានត្រួតពិនិត្យនាវានេះ និងចេញការព្រមាន។

ទីបញ្ជាការភាគខាងត្បូងចិន បានគូសបញ្ជាក់ថា ប្រទេសចិនមានអធិបតេយ្យ ដែលមិនអាចប្រកែកបានលើកោះនានាក្នុងសមុទ្រចិនខាងត្បូង និងតំបន់ដែនសមុទ្រជុំវិញ។

គួរបញ្ជាក់ថា ថ្មប៉ប្រះទឹក Mischief ក៏ស្ថិតនៅភាគខាងលិចនៃកោះ Palawan របស់ប្រទេសហ្វីលីពីនដែរ៕

ប្រែសម្រួល៖ Vann Vann

ប្រភព៖ Reuters

ចុចអាន៖ ជប៉ុន និង ចិន ជួប ប្រជុំ គ្នា ដើម្បី ពិភាក្សា ពី កង្វល់ ដែន សមុទ្រ