មន្ទីរបញ្ចកោណ ថា ឯកសារ​លេច​ធ្លាយ គឺ​ហានិភ័យ​ធ្ងន់ធ្ងរចំពោះ សហរដ្ឋអាមេរិក 

នៅក្នុងការអត្ថាធិប្បាយជាផ្លូវការលើកដំបូងស្តីពីការលេចធ្លាយឯកសារចារកម្មយោធាសម្ងាត់លើប្រព័ន្ធផ្សព្វផ្សាយ, អ្នកនាំពាក្យក្រសួងការពារជាតិអាមេរិក បាននិយាយកាលពីថ្ងៃចន្ទទី១០ខែមេសាថា រឿងនេះគឺជាហានិភ័យដ៏ធ្ងន់ធ្ងរចំពោះទីក្រុងវ៉ាស៊ីនតោន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Chris Meagher បានប្រាប់អ្នកយកព័ត៌មានថា ឯកសារទាំងនោះ បង្កហានិភ័យយ៉ាងធ្ងន់ធ្ងរដល់សន្តិសុខជាតិ និងធ្វើឲ្យរីករាលដាលព័ត៌មានមិនពិត។

លោកបន្ថែមថា “ក្រុមការងារមន្ទីរបញ្ចកោណ កំពុងធ្វើការដើម្បីវាយតម្លៃថាតើឯកសារនោះជាឯកសារពិតឬអត់ ប៉ុន្តែរូបថតដែលចែកចាយលើប្រព័ន្ធផ្សព្វផ្សាយសង្គម បានបង្ហាញឲ្យឃើញនូវឯកសារស្រដៀងគ្នាទៅនឹងឯកសារដែលយើងប្រើដើម្បីផ្តល់ព័ត៌មានថ្មីៗប្រចាំថ្ងៃដល់មេដឹកនាំជាន់ខ្ពស់របស់យើងអំពីប្រតិបត្តិការទាក់ទងនឹងអ៊ុយក្រែន និងរុស្ស៊ី”។

ថ្វីបើឯកសារលេចធ្លាយដំបូង បានលាតត្រដាងត្រឹមតែព័ត៌មានទាក់ទងនឹងជម្លោះអ៊ុយក្រែនក៏ដោយ ប៉ុន្តែឯកសារចុងក្រោយបំផុតដែលបែកធ្លាយកាលពីថ្ងៃសុក្រ គឺបានទម្លាយព័ត៌មានអំពីប្រទេសចិន កូរ៉េខាងត្បូង ទីបញ្ជាការយោធាឥណ្ឌូប៉ាស៊ីហ្វិក មជ្ឈិមបូព៌ា ប្រតិបត្តិការប្រឆាំងភេរវកម្ម និងអ៊ីស្រាអែល។

ស្របពេលជាមួយគ្នានោះដែរ លោក Meagher បានគូសបញ្ជាក់ថា “យើងនៅតែកំពុងស៊ើបអង្កេតថាតើ ការបែកធ្លាយនេះកើតឡើងយ៉ាងដូចម្តេច ហើយពិនិត្យមើលឲ្យកាន់តែច្បាស់អំពីរបៀបដែលព័ត៌មានប្រភេទនេះត្រូវបានចែកចាយ និងថាតើវាត្រូវបានចែកចាយទៅអ្នកណាខ្លះ”៕

ប្រែសម្រួល៖ Vann Vann

ប្រភព៖ RT

ចុចអាន៖ បែកធ្លាយឯកសារសម្ងាត់របស់មន្ទីរបញ្ចកោណ លាតត្រដាងសុទ្ធព័ត៌មានរសើប