ដឹងទេ តើប្រទេសអាស៊ានណាខ្លះប្រារព្ធពិធីបុណ្យចូលឆ្នាំថ្មីប្រពៃណីជាតិ ដូច កម្ពុជា ដែរ?

ព្រះរាជាណាចក្រកម្ពុជា នឹងរៀបចំពិធីបុណ្យចូលឆ្នាំថ្មីប្រពៃណីជាតិ ឆ្នាំថោះ រយៈពេល ៣ ថ្ងៃ ពោលចាប់ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៣ ខណៈបណ្ដាប្រទេសអាស៊ានផ្សេងទៀតក៏មានការប្រារព្ធពិធីបុណ្យចូលឆ្នាំថ្មីដូចគ្នាទៅនឹងកម្ពុជាផងដែរ ។

ប្រទេសអាស៊ាន ៣ ផ្សេងទៀតដែលនឹងប្រារព្ធពិធីបុណ្យចូលឆ្នាំថ្មីក្នុងខែមេសា ដូចគ្នានឹងព្រះរាជាណាចក្រកម្ពុជាផងដែរនោះរួមមាន ប្រទេសថៃ ឡាវ និងមីយ៉ាន់ម៉ា ដោយគ្រាន់តែការរៀបចំខុសៗគ្នាទៅតាមប្រពៃណីរបស់ប្រទេសពួកគេ ។

ប្រទេសថៃនឹងរៀបចំពិធីបុណ្យចូលឆ្នាំថ្មី ឬសង្ក្រាន្ត (Songkran) នៅថ្ងៃទី១៣ ដល់ថ្ងៃទី១៥ ខែមេសា ហើយក៏មានការប្រារព្ធពិធីដូចជា ការគោរពមនុស្សចាស់ ការស្រង់ព្រះ និងលេងជះទឹកក្រអូបដាក់គ្នាជាដើម ។

មិនខុសពីថៃឡើយ មីយ៉ានម៉ាក៏បានប្រារព្ធពិធីបុណ្យចូលឆ្នាំថ្មីផងដែរដែលគេហៅថា ពិធីបុណ្យ Thingyan ។ មីយ៉ាន់ម៉ានឹងរៀបចំពិធីបុណ្យនេះរយៈពេល ៤ ថ្ងៃ ចាប់ពីថ្ងៃទី១៣ ដល់ថ្ងៃទី១៦ ខែមេសា ប៉ុន្តែដោយសារតែប្រទេសជាតិកំពុងជួបភាពវឹកវរ ដូច្នេះមិនទាន់ប្រាកដថានឹងប្រារព្ធពិធីបុណ្យចូលឆ្នាំថ្មីឬយ៉ាងណានោះទេ ។

ទោះជាយ៉ាងណា ក្នុង​អំឡុង​​ពេល​នៃ​​ឱកាស​ថ្ងៃ​បុណ្យ​ចូល​ឆ្នាំ​​ថ្មី​​​នេះ​ ប្រជាជន​មីយ៉ាន់ម៉ា​ តែង​ធ្វើ​ពិធី​ស្រង់​អ្នក​មាន​គុណ ដូចជា ​មាតា បិតា និងជីដូន​​ជីតា​ចាស់​ៗជាដើម ។ ក្រោយ​មក​មាន​ការ​សម្ដែង​សិល្បៈ​​​ រាំ​ និង​ការ​លេង​បាច​ទឹក​ដាក់​គ្នា​ផង​ដែរ ។

ទន្ទឹមនោះ ប្រទេសឡាវក៏នឹងរៀបចំពិធីបុណ្យចូលឆ្នាំថ្មីផងដែរ ដែលមានឈ្មោះថា Pi Mai ហើយនឹងប្រារព្ធឡើងមិនខុសពីព្រះរាជាណាចក្រកម្ពុជានោះទេ ពោលគឺមានរយៈពេល ៣ នៅថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៣ នេះ ៕

អត្ថបទ ៖ ជីវ័ន្ត

ចុចអាន ៖ ខេត្តឆ្នេរសមុទ្រ ថៃ នឹងជួបសីតុណ្ហភាពក្ដៅបំផុត ៥៤ អង្សាសេ ខណៈ បាងកក ៥០ អង្សាសេ

ចុចអាន ៖ ប៉ូលិសក្រុងតូក្យូចាប់ខ្លួនក្រុមឆបោកតាមទូរស័ព្ទ ក្រោយបណ្តេញចេញពី កម្ពុជា