វៀតណាម គ្រោងចំណាយ ៤៣៥ លានដុល្លារ កាត់បន្ថយភាពក្រីក្រក្នុង ក្រុងហូជីមិញ

អាជ្ញាធរទីក្រុងហូជីមិញគ្រោងចំណាយប្រាក់ជាង ៤៣៥ លានដុល្លារលើកម្មវិធីកាត់បន្ថយភាពក្រីក្រប្រកបដោយនិរន្តរភាពនៅឆ្នាំ ២០២៣ នេះ ។

ជាផ្នែកមួយនៃកម្មវិធីនេះ ទីក្រុងនឹងផ្តល់កញ្ចប់ឥណទានដែលមានតម្លៃប្រហែល ៧២.២ លានដុល្លារក្នុងអត្រាការប្រាក់អនុគ្រោះ ខណៈជិត ១៧.៨ លានដុល្លារ ជាជំនួយដែលមិនអាចដកវិញបាន និង ៦៧៩,២០០ ដុល្លារក្នុងនិរន្តរភាពនៃកម្មវិធីកាត់បន្ថយភាពក្រីក្រនៅគ្រប់កម្រិត ។

លោក Le Van Thinh អនុប្រធានអចិន្ត្រៃយ៍នៃគណៈកម្មាធិការដឹកនាំកម្មវិធីកាត់បន្ថយភាពក្រីក្រប្រកបដោយនិរន្តរភាពរបស់ទីក្រុងបាននិយាយថា ទីក្រុងហូជីមិញមានគោលបំណងកាត់បន្ថយគ្រួសារក្រីក្រចំនួន ០.៣៨ ភាគរយ និងគ្រួសារជិតក្រីក្រចំនួន ០.២៨ ភាគរយ ។

ក្រោមស្តង់ដារភាពក្រីក្ររបស់ទីក្រុងចាប់ពីឆ្នាំ ២០២១-២០២៥ គ្រួសារក្រីក្រនឹងមានប្រាក់ចំណូលជាមធ្យមក្នុងម្នាក់ក្រោម ១,៥៣០ ដុល្លារក្នុងមួយឆ្នាំ ខណៈគ្រួសារជិតក្រីក្រគឺ ១,៩៥០ ដុល្លារក្នុងមួយឆ្នាំ ។

ចំពោះវិធានការជួយជនក្រីក្រនេះដែរ រួមមាន ប្រាក់កម្ចី ការបណ្តុះបណ្តាលវិជ្ជាជីវៈ ការណែនាំការងារ និងអាហារូបករណ៍ ព្រមទាំងការគាំទ្រសម្រាប់ការអប់រំ ផ្ដល់លំនៅដ្ឋាន ការថែទាំសុខភាព និងជំនួយផ្នែកច្បាប់សម្រាប់ជនក្រីក្រ និងជនជិតក្រីក្រជាដើម ។

គួរបញ្ជាក់ថា កាលពីឆ្នាំមុន ក្រុងហូជីមិញមានគ្រួសារក្រីក្រតិចជាង ១៦,១០០ គ្រួសារ ខណៈគ្រួសារជិតក្រីក្រមាន ៩,៧០០ គ្រួសារ ។ ចំណែកគិតត្រឹមដំណាច់ឆ្នាំកន្លងទៅ ទីក្រុងទាំងមូលមានគ្រួសារក្រីក្រជាង ២១,៣០០ គ្រួសារ និងគ្រួសារជិតក្រីក្រចំនួន ១៨,០៦៨ គ្រួសារ ៕

ប្រែសម្រួលដោយ ៖ នាង​ រតនៈ

ប្រភព ៖​ VN Express

ចុចអាន ៖ អាជីវករខឹងសម្បារនឹងរដ្ឋាភិបាល ឥណ្ឌូណេស៊ី ដែលហាមមិនឲ្យលក់ ខោអាវជជុះ